Semje om noregspris for studentar: – Eit hol i systemet som vi bør tetta
Budsjettpartia er samde om å finna ei løysing for å få studentbustader inkludert i noregspris. Den vil dei ha klar før det reviderte budsjettet blir lagt fram.
Det var han og SV som fremja forslaget om å få studentbustadene inn i noregspris-ordninga.
No er det klart at alle dei såkalla tuttifruttikameratane – Ap, Sp, Raudt og MDG – er med og sikrar fleirtal for å finna ei løysing på problemet.
Innan våren
Regjeringa får i oppgåve å greia ut korleis studentar som leiger av samskipnadene eller stiftingar kan få kompensasjon for auka straum og fjernvarmeutgifter – innan revidert nasjonalbudsjett vert lagt fram i mai.
– Intensjonen vår med noregspris har alltid vore å sikra alle hushalda låge og stabile straumprisar som skaper meir føreseielegheit i kvardagen. Når vi ser at ordninga ikkje treffer alle gruppene i samfunnet, må vi sjå på andre løysingar som kan fungera for dei, seier Solveig Vik i Ap til NTB.
– For Arbeidarpartiet er det viktig å sikra ei god løysing for studentane, ei ordning som faktisk kjem studentane til gode, legg ho til.
– Hol i systemet
Bakgrunnen for saka er at Reguleringsmyndigheita for energi (RME) har fastslått at studentsamskipnadene ikkje har rett på straumstønad eller noregspris som bustadselskap.
Samtidig meiner RME at samskipnadene må betala tilbake 95 millionar kroner i feilaktig utbetalt straumstøtte.
Måndag vart det kjent at Studentsamskipnaden i Oslo og Akershus (SIO) aukar leiga som følgje av at straumstøtta fall bort frå 1. desember i fjor.
– Både straumstøtteordninga og noregspris er jo meint å treffa alle hushalda. Så dette er eit hol i systemet som vi bør tetta, seier Sofie Marhaug i Raudt.
– Uhaldbart
Ole Herman Sveian i Senterpartiet seier at partiet hans har vore med å forbetra noregspris-ordninga tidlegare.
– No er vi med og gjer ordninga endå betre. Det er jo bra at vi også kan vera med å gi ein lette for studentane. Det er jo ei gruppe som har behov for dei pengane dei kan få, seier Heian.
Frøya Skjold Sjursæther i MDG har denne kommentaren:
– Det er uhaldbart at studentane må betala 3,50 kroner for straumen, medan resten av befolkninga får subsidiert straumforbruket sitt ned til 50 øre. Og då skal ikkje vi politikarar gjera ordninga endå dårlegare.
Miljøpartiet er eigentleg mot noregspris.
– Men når han først er innført, skal sjølvsagt alle få tilgang til han – også studentar, seier ho.
