Boka Himmelbrann er ein heftig pageturnar om skeiv og samisk kjærleik.
Kan ein skriva ei kjærleiksforteljing som tematiserer raseforsking? Ja, absolutt!
Moa Backe Åstot har gjort nettopp dette med stor suksess med ungdomsromanen Himmelbrann, debutboka hennar. Då ho kom ut på svensk i 2021, blei ho mellom anna nominert til Nordisk råds barne- og ungdomslitteraturpris.
Fakta
Tittel: Himmelbrann
Forfattar: Moa Backe Åstot
Omsetjar: Nina Aspen
Forlag: Cappelen Damm
Utgjeven: Februar 2026
Sjanger: Ungdomsroman
Himmelbrann handlar om Ánte som er heilt sinnssjukt forelska i Erik. Men Ánte lever djupt inne i skåpet, tvilande til at ein kan vera både skeiv og reindriftssame. Erik har endåtil ein jentekjæraste.
Plottet er meisterleg snikra saman, og Ánte sitt tenåringsliv er kaotisk og forvirrande – nett sånn det skal vera i ein god ungdomsroman.
Tematisk rik
Himmelbrann er ei tematisk rik bok. Åstot har klart å veva saman spørsmål om kjærleik, seksualitet, samisk identitet, utanforskap og tilhøyrsel.
Det er særleg imponerande korleis historia om (den forkastelege og psevdovitskapelege) raseforskinga på samane blir brukt til å spegla sinnet og identitetskrisa til Ánte.
Oppdaginga hans av nokre av dei mindre lystige sidene ved den samiske fortida virvlar opp mange spørsmål om kven han er og kor han høyrer til.
Knuste hjarte
Boka set heile kjensleapparatet i sving. Det er lett å leva seg inn i handlinga. Eg fekk stor medkjensle med Ánte, sjølv om han også tidvis kunne gjera meg skikkeleg frustrert.
Særleg forholdet hans til Hanna er ein pageturnar. Sjølv om han har null interesse for jenter, let Ánte Hanna tru at han er forelska i ho. Den falske flørten er ein god måte å døyva angsten han ber på.
Sjølvsagt blir det nokre knuste hjarte.
Eg blir generelt gal av kor vanskeleg livet til Ánte skal vera. Ein vil så inderleg at Ánte (og Erik) skal finna ut av det.
Vanskeleg å leggja frå seg
Heile teksten er velskriven. Og dette er kanskje den boka som best – og på saumlaust vis – skildrar korleis det konstante nærværet av mobilar og internett er ein del av samtidas tenåringskvardag.
Himmelbrann er ei særs medrivande bok. Ho er vanskeleg å leggja frå seg, så set gjerne av nok tid til å lesa heile på ein gong.
Viss du treng ein god dose kjærleiksdrama, er dette boka for deg.
