Vekas viktigaste: Trump lagar eige fredsråd og er «besett» av Grønland

Trump droppar straffetoll for Nato-land

Under Verdas økonomiske forum i Davos heldt Trump ein tale der han brukte mykje tid på å snakke om Grønland.

Statsminister Jonas Gahr Støre uttala etterpå at Trump nærmast er besett av Grønland, ifølgje NRK

Trumps sa likevel at USA ikkje vil bruk bruke makt for å ta Grønland.

Den amerikanske presidenten truga med 10 prosent straffetoll mot Noreg og andre Nato-allierte som har motsett seg at USA skal ta over Grønland. Trump ville legge straffetollen på Nato-landa som hadde sendt soldatar til Grønland. Noreg sende to offiserar for å planlegge Nato-øvingar som var avklart med Nato og som USA kjente til, forklarar Støre.

Etter ein samtale mellom Trump og Natos generalsekretær Mark Rutte, skal straffetollen ha blitt avlyst. Dei skal ha blitt samde om ein framtidig Grønland-avtale, noko Danmark og Grønland understrekar at ikkje kan bli til utan at dei er med i samtalane.

Fleire store togulukker i Spania

Den siste veka har to store togulukker prega Spania. Søndag skjedde ei ulukke ved Adamuz i Andalucía-regionen sør i Spania. Ifølgje nyheitsbyrået AFP er det funne 45 døde etter ulukka og over 120 vart skadde. Årsaka til ulukka er ukjent.

Det blei erklært landesorg i tre dagar som følgje av ulukka, skriv VG.

Tysdag kveld skjedde det ei ny togulukke, då ein støttemur fall ned på jernbanesporet i nærleiken av Barcelona. Éin person er død og 37 skadde, ifølgje styresmaktene. Fem av dei skal vere alvorleg skadde. Det spanske jernbaneselskapet Adif meiner muren truleg kollapsa på grunn av kraftig nedbør den siste veka, skriv ABC News.

Styresmaktene etterforskar årsakene til begge ulukkene.

Skogbrannar herjar i Sør-Amerika

Argentina og Chile er råka av kraftige skogbrannar. I Chile er minst 20 personar døde som følgje av brannane, melder AP News.

Skogbrannane har øydelagt fleire bustadområde i landet, og tvinga over 50 000 til å evakuere, skriv nyheitsbyrået. President Gabriel Boric har erklært unntakstilstand.

Vind, tørke og ei pågåande hetebølgje har bidratt til brannane. Delar av Argentina opplever den verste tørken på over 60 år. Ifølgje NRK mistenkjer lokale styresmakter òg at ein av brannane er påtend, og landets visepresident har tatt til orde for strengare straffer for slike lovbrot.

Sør-Koreas tidlegare statsminister dømt til fengsel

Sør-Koreas tidlegare statsminister Han Duck-soo blei onsdag dømt til 23 års fengsel, melder NTB.

Han er dømt for å ha spelt ei nøkkelrolle då president Yoon Suk-yeol oppløyste nasjonalforsamlinga og innførte unntakstilstand i desember 2024. Opposisjonen meiner at presidenten forsøkte å kuppe til seg meir makt.

Yoon blei førre veke dømt til fem år fengsel for å ha hindra politiet, og det er venta fleire dommar mot ekspresidenten, som risikerer dødsstraff, skriv nyheitsbyrået.

Rekordmange norske Oscar-nominasjonar

Framlegginga av årets Oscar-nominasjonar vart ein fest for norsk film. Både Affeksjonsverdi og Den stygge stesøsteren kan smykke seg med å ha blitt nominerte til verdas mest prestisjetunge prisutdeling.

Joachim Triers Affeksjonsverdi fekk heile ni nominasjonar, som er ny norsk rekord. Det er første gong i historia at ein norsk film blir nominert til beste film. Filmen er nominert i kategoriane:

• Beste film
• Beste internasjonale film
• Beste klipp
• Beste regi
• Beste originalmanus
• Beste kvinnelege skodespelar (Renate Reinsve)
• Beste mannlege birolle (Stellan Skarsgård)
• Beste kvinnelege birolle (Inga Ibsdotter Lilleaas og Elle Fanning)

I tillegg er Den stygge stesøsteren nominert i kategorien beste sminke og hårstyling.

Oscar-utdelinga, eller Academy Awards, går av stabelen 16. mars.