Vekas viktigaste: Gaza-avtale, politisk kaos og val i Syria

Politisk kaos i Frankrike

Måndag trekte den franske statsministeren Sébastien Lecornu seg, etter berre 27 dagar i rolla. Han går av på grunn av politisk kaos og manglande støtte i nasjonalforsamlinga, skriv NRK.

Den siste tida har Frankrike vore prega av demonstrasjonar mot regjeringa sitt budsjettforslag, som legg opp til store kutt i offentlege utgifter.

Lecornu er den femte franske statsministeren som har gått av frå 2024.

Opposisjonspartiet Nasjonal samling krev nyval, og fleire franske politikarar meiner at også president Macron må gå av.

Det er venta at den franske presidenten vil utnemne ein ny statsminister i løpet av i dag.

Telenor blir saksøkt for Myanmar-data

Thazin Nyunt Aung saksøker Telenor for å ha utlevert teledata om mannen hennar, Zeya Thaw, til militæret i Myanmar.

I 2021 skjedde det eit militærkupp i landet. NRK har avslørt at Telenor overleverte sensitive data om hundrevis av abonnentar til militærjuntaen.

Ein av dei var Zeya Thaw, som vart arrestert 18 dagar seinare, og seinare avretta.

Fleire enkeltpersonar og organisasjonar er med i søksmålet, som blir leidd av tre norske toppadvokatar.

Informasjonssjef i Telenor, David Fidjeland, seier til NRK at Telenor Myanmar hamna i ein forferdeleg situasjon og ikkje hadde nokon gode val.

Syria har gjennomført sitt første val etter Bashar al-Assad

Søndag 5. oktober gjennomførte Syria sitt første indirekte val etter at regimet til Bashar al-Assad vart styrta i fjor.

10 000 av Syria sine rundt 25 millionar innbyggarar var plukka ut til å stemme i valet. Fleirtalet av desse var plukka ut av regjeringa og stemmer fram to tredelar av medlemmane i parlamentet, som skal bestå av 210 medlemmar. 70 av medlemmane vert direkte utpeikt av president Ahmed al-Sharaa, ifølgje CNN.

Ahmed al-Sharaa er ein tidlegare jihadist som har kjempa med Al-Qaida, men har dei seinare året kommunisert meir moderate haldningar.

Valet har fått kritikk for å ikkje vere fritt, og at minoritetar er dårleg representert. Berre sju kvinner er stemt fram av veljarane, noko som gjer at al-Sharaa må utnemne fleire kvinner om Syria skal nå målsettinga si om 20 prosent kvinner i parlamentet.

Den nye nasjonalforsamlinga skal lage eit forslag til ny grunnlov og førebu eit direkte val i neste periode.

Fleire unge varetektsfengsla i 2024

Den siste tida har ei rekkje alvorlege valdshendingar gjennomført av mindreårige lovbrytarar knytt til organisert kriminalitet rysta Noreg.

Tal frå SSB viser at det var 65 varetektsfengslingar av barn og unge under 18 år i 2024. Det er ein auke frå 47 varetektsfengslingar året før, og over dobbelt så mange som har vore normalt i perioden 2013-2022.

Ikkje sidan 2012 har nivået vore på nivå med fjoråret. Då var det 60 varetektsfengslingar av mindreårige.

Normalt sett er det alvorlege valdshendingar som fører til varetekt eller fengsling.

Talet på fengselsstraffer for barn og unge har likevel ikkje gått opp, fordi unge i alderen 15 til 17 år vanlegvis får andre typar straffer.

Lyspunkt: Fleire overlever blodkreft med stamcelletransplantasjon

Transplantasjon av stamceller kan føre til at pasientar med akutt blodkreft lever lenger eller blir kurert, skriv NTB.

Det kjem fram i ein studie publisert i Tidsskrift for Den norske legeforening.

Delen som overlever fem år etter stamcelletransplantasjon har auka frå 48 til 63 prosent sidan 2005. Behandlinga har òg blitt tryggare.