EØS-ekspert meiner forslag om aldersgrense på sosiale medium er ubrukeleg
Stian Øby Johansen ved Universitetet i Oslo seier regjeringa sitt forslag bør leggjast i ein skuff.
Oppdatert 10:25 med at Barneombodet støttar aldersgrense. I ein tidlegare versjon stod det at dei meinte tiltaket vil gripe unødig inn, og at dei i staden etterlyste forbod mot «avhengigheitsskapande design».
Forslaget om 15-årsgrense på sosiale medium møter hard kritikk frå EØS-ekspert Stian Øby Johansen ved Universitetet i Oslo.
– Forslaget bør leggjast i ei skuffe, skuffa bli låst og nøkkelen kasta, skriv Johansen i høyringssvaret sitt til Barne- og familiedepartementet, melder Rett 24.
Departementet opplyser at rundt 8000 høyringssvar kom inn innan fristen tysdag.
Lovforslaget inneber at sosiale medium må innføre tekniske løysingar for å hindre brukarar under 15 år i å opprette kontoar i Noreg. Selskap som ikkje følgjer opp, kan påleggjast gebyr.
Johansen meiner forslaget er ubrukeleg og er folkerettsleg tvilsamt å handheve. Han meiner det er klart EØS-stridig og vil bety eit uforholdsmessig inngrep i ytringsfridommen
Han viser til at det vil krevje identifisering av alle brukarar, noko som «vil virke avskremmande for mange vaksne», mellom anna på plattformer som Tinder og Gaysir.
Datatilsynet omtaler forslaget som «noko umodent», medan Forbrukartilsynet tviler på at lova vil ha nokon reell effekt.
Barneombodet meiner tiltaket vil gripe unødig inn i rettane til barn, men støttar likevel å innføre aldersgrense ut frå eit helseperspektiv. Samtidig etterlyser dei i høyringssvaret sitt mellom anna eit forbod mot «avhengnadsskapande design» på nett.
