Haaland om vrien norsk VM-trekking: – Det blir tøft

Bolivia og Surinam skal møtast i semifinalen i playoffspelet som skal peike ut Noregs motstandar. Vinnaren der møter Irak til finalekamp.

Noreg skal møte det nemnde playofflaget i den første gruppekampen i VM. Den blir spelt 16. juni. Deretter ventar Senegal, før puljespelet blir avslutta mot Frankrike.

– Dette er ei gruppe vi skal kunne matche laga i. Det blir veldig moro å køyre på, sa landslagsassistent Kent Bergersen på TV 2s sending.

Midtbaneprofilen Morten Thorsby stemde i.

– Vi burde ha gode moglegheiter, sa Italia-proffen.

Spisstjerna Erling Braut Haaland omtalte Frankrike og Senegal som vrine i ei melding på Snapchat.

– Frankrike og Senegal er tøft, skreiv jærbuen.

Kampar på austkysten

VM-trekkinga vart unnagjord i Kennedy Center i Washington D.C fredag. Det er 188 dagar til turneringa i USA, Canada og Mexico går i gang.

Noreg var seeda i pott nummer tre i trekkinga fredag. Det betyr at kampane skal avviklast på austkysten i USA i byane Boston/New Jersey/Philadelphia. Det betyr gunstige TV-tider for fotballinteresserte nordmenn.

Vinn Noreg gruppa, møter dei ein trear i 16.-delsfinale i New Jersey. Då blir det kampar på austkysten fram til og med kvartfinale. Går Noreg vidare som gruppetoar, blir det 16.-delsfinale mot toaren i gruppe E (Tyskland/Elfenbeinskysten/Ecuador) i Arlington (Dallas), deretter tilbake til austkysten i to neste rundar. Går Noreg vidare som trear, er det mange alternativ.

Det internasjonale fotballforbundet (Fifa) har teke nye grep framfor den kommande VM-utgåva. Dei to høgast rangerte laga, Spania og Argentina, kan ikkje møtast før i finalen om dei begge vinn gruppene sine. England og Frankrike kan ikkje møte dei to topprangerte laga før semifinalen om også dei vinn puljane sine.

Dei to beste laga i kvar gruppe og dessutan dei åtte beste av tolv trearar går vidare til utslagsrundane.

Stjerner og glamour

Arrangementet i Washington fredag vart eit stjernespekka show. I tillegg til at USAs president Donald Trump var i publikum og vart tildelt Fifas omstridde fredspris, vart seansen leidd av tidlegare supermodell Heidi Klum og komikaren Kevin Hart.

Manchester United-legenda Rio Ferdinand og den amerikanske TV-personlegdommen Samantha Johnson hadde fått jobben med å lóse publikum og TV-sjåarane gjennom sjølve gruppetrekkinga.

Med seg som «assistentar» hadde dei svært profilerte nordamerikanske idrettsprofilar som Tom Brady, Wayne Gretzky, Aaron Judge og Shaquille O’Neal.

NFL-legenda Eli Manning var vert på den raude løparen før seremonien. Han har vore med på å vinne Super Bowl to gonger.

Tolv grupper

Opningskampen i VM neste år blir spelt på Azteca-stadionet i Mexico by 11. juni. Den amerikanske gigantarenaen i East Rutherford i New Jersey husar finalen 19. juli.

For første gong blir det 48 lag i eit fotball-VM neste år. Deltakarane blir dermed delte inn i tolv grupper a fire lag. Ei rekke premissar var på førehand lagde før seansen fredag, som at vertsnasjonane USA, Canada og Mexico var toppseeda.

Spenningsmomenta var på førehand mange for landslagssjef Ståle Solbakken, som var på plass i Washington. Utfallet legg naturleg nok premissane for Noregs moglegheiter for avansement til cupspelet.