Høgsterett: Fosen-aksjonistane kan ikkje straffast
Fosen-aksjonistane som tok seg inn i Energidepartementet og blokkerte Finansdepartementet, kan ikkje straffast, slår Høgsterett fast.
– I dette tilfellet hadde demonstrantane opptredd fredeleg og ordentleg, aksjonen var ikkje meir forstyrrande enn nødvendig for å få fram bodskapen, og dei sikta hadde ikkje alternative ytringsmåtar som ville vore mindre forstyrrande og samtidig effektive, skriv Høgsterett i ei pressemelding.
Høgsterett legg vekt på at innbringinga til sentralarresten var unødvendig og mangla heimel i lov. Straff må då reknast som uforholdsmessig, og anken frå påtalemakta blir forkasta, skriv dei vidare.
Fleire demonstrantar som aksjonerte mot vindkraftutbygging på Fosen, fekk bøter for å ha teke seg inn i Energidepartementet og blokkert Finansdepartementet og Keysers gate 6 i Oslo i februar og mars i 2023.
Dei nekta å vedta bøtene, og saka gjekk dermed til retten, der dei vart frikjende både i tingretten og i lagmannsretten.
NRK har intervjua aksjonist Elle Rávdná Näkkäläjärvi, som er letta over dommen.
– Det følest veldig godt å vete at vi har vunne i tre rundar, det viser at det nyttar å ytra seg. Ein skal ikke straffast for å kjempe for menneskerettar.
