Regjeringa vil stanse skadelege utanlandsopphald for barn
Regjeringa vil setje ein stoppar for at barn blir utsette for skadelege utanlandsopphald ved å gi barnevernet rett til å stanse utreise.
– Ingen av barna våre skal takast ut av landet og utsetjast for tvangsekteskap, kjønnslemlesting, vald og mishandling. Utreiseforbodet blir eit nytt verktøy for barnevernstenesta og politiet. Eit kraftig, men nødvendig verkemiddel seier arbeids- og inkluderingsminister Tonje Brenna.
Både Kompetanseteamet mot negativ sosial kontroll og æresrelatert vald og mangfaldsrådgivarane har hatt ein stor auke i talet på saker om frykt for ufrivillig opphald i utlandet i 2024.
Regjeringa foreslår derfor endringar i både barnevernslova, straffelova, passlova og Id-kortlova. Dei mest omfattande forslaga vil liggje i barnevernslova.
– For at utreiseforbodet skal ha størst effekt er det viktig at alle som møter utsette barn, på skulen, i barnevernet eller hos politiet, kjenner til dette nye og viktige verktøyet. Alle skal vite at dette ikkje er lov, og barna skal vite at samfunnet står bak dei, seier arbeids- og inkluderingsministeren.
Om du eller nokon du kjenner står i fare for å bli teke til utlandet, eller står fast utan moglegheit for retur kan du kontakta Barnevernet eller Kompetanseteamet til Bufdir på kompetanseteamet@bufdir.no eller telefon +47 47805090 (mandag til fredag kl 09-15 norsk tid)
