Høgre seier ja til ny samtykkelov – sikrar fleirtal på Stortinget
Sandra Bruflot, Høgres kvinnepolitiske talsperson, bekreftar overfor VG at også dei stiller seg bak den nye samtykkelova. Dermed er det fleirtal for forslaget.
– Eg er glad for at Høgre sikrar fleirtal for ei ny samtykkelov. Kvar femte kvinne rapporterer å ha blitt valdtatt, og tala aukar. Valdtekt, enten det rammar kvinner eller menn, er eit stort samfunnsproblem, seier Bruflot til avisa.
Lovforslaget blei lagt fram av justisminister Astri Aas-Hansen (Ap) i april. Mange skildrar lova som at «berre ja betyr ja». Ho er glad for at det no har blitt fleirtal for forslaget.
– Sjølvsagt
– Vi har foreslått reglar som gir ein betre rettstilstand knytt til seksuell omgang utan samtykke. Sex skal vere frivillig, og eg håpar det blir sjølvsagt for alle at ein berre har sex når alle partar ønsker det. På den måten kan lova også verke førebyggande, seier Aas-Hansen.
Allereie i april var det klart at fleire parti ville støtte den nye lova. Raudt, SV, MDG, Venstre og KrF har lenge støtta opp om ei samtykkelov.
Senterpartiet har ifølge TV 2 vore på vippen på grunn av lovteksten i forslaget, men Høgres ja betyr at lova mest sannsynleg blir vedtatt.
– Med dagens lov er det ikkje ei valdtekt sjølv om den utsette græt, vrir seg unna eller seier stopp, seier Bruflot til VG.
Støttar «ja er ja»
Senterpartiet vil også ha på plass ei samtykkelov for å tette hol i dagens lovgiving, fastslår justispolitisk talsperson Else Marie Rødby og utdjupar kva dei vil endre i lovforslaget.
– Vi støttar ein «ja er ja» føresegn, med presiseringa «klart» som eit tillegg til det regjeringa har lagt fram. Vi meiner dette vil gi ei god og balansert samtykkelov der det skal vere tydeleg at seksuell omgang krev samtykke.
