Vekas viktigaste: Kamp om Melkøya, ny LO-leiar og gigakonsert

Stortinget stansar ikkje elektrifisering av Melkøya

I 2023 gav regjeringa Equinor klarsignal til å starta med elektrifisering av naturgassanlegget på Meløya utanfor Hammerfest i Finnmark. Det skal skje med vindkraft frå land, noko fleire fryktar vil gå ut over kraftforsyninga i fylket.

Arbeidet er allereie i gang, men har møtt mykje motstand frå opposisjonen på Stortinget.

Det vart eit knapt fleirtal for å ikkje skrota planane om elektrifisering av Melkøya då Stortinget stemte over saka onsdag. 85 representantar stemte for, 84 imot, ifølgje VG.

Frp, Raudt, MDG, SV, KrF og Senterpartiet stemte for forslaget om å be regjeringa koma med alternative planar for elektrifiseringa, medan Arbeidarpartiet, Høgre og Venstre stemte imot.

Opposisjonen er ikkje einige om ei løysing. SV og Raudt lovar å kjempa vidare for karbonfangst og lagring, noko Frp meiner blir for dyrt.

Nasjonalistisk støtte i presidentvalet i Romania

Søndag 4. mai var det første runde med presidentval i Romania. Nasjonalistiske George Simion fekk flest røyster, med over 40 prosent oppslutning. Simion er leiar i partiet Alliansen for unionen av rumenarar (AUR), som er kritisk til Ukraina-støtte og EU. Han har også besøksforbod i nabolandet Moldova, som han meiner bør bli ein del av Romania.

Nyvalet skjer etter at valet i fjor vart annullert på grunn av skuldingar om russisk innblanding. Sidan ingen av kandidatane fekk fleirtal i valet på søndag, vil andre valrunde skje 18. mai. Då kan rumenarane røyste på George Simion eller den liberale kandidaten Nicușor Dan som president.

Dan er ordførar i hovudstaden Bucuresti. Han var tidlegare ein del av det liberale partiet Unionen Redd Romania (USR), men er i dag partipolitisk uavhengig.

Robert Francis Prevost (69) er ny pave

Den amerikanske kardinalen Robert Francis Prevost (69) vert ny pave, og får namnet pave Leo XIV.

Torsdag kveld kom den kvite røyken frå Vatikanet som signaliserte at dei 133 kardinalane var einige om pave Frans sin etterfølgjar.

Han er fødd i Chicago av foreldre med fransk og ecuadoriansk opphav, men har mesteparten av prestelivet jobba som misjonær i Peru, skriv VG.

Prevost kan mange ulike språk og er utdanna matematikar og teolog, med doktorgrad i kyrkjerett.