Vekas viktigaste: Tollkrig, samtykkelov og takkollaps

Minst 144 døde etter takkollaps i Den dominikanske republikken

Natt til tysdag kollapsa eit tak på eit diskotek i hovudstaden Santo Domingo i Den dominikanske republikken. Ifølgje NTB var minst 144 personar onsdag stadfesta døde etter ulukka onsdag.

Redningstenesta har tidlegare sagt at 150 personar vart skadde. Det skal ha vore mellom 500 og 1000 personar i lokalet, som har ein kapasitet på 700 personar sitjande, eller 1000 personar ståande.

Det er uklart kva som førte til ulukka.

Ukraina hevdar å ha teke kinesiske soldatar til fange

Ifølgje Volodymyr Zelenskyj har 155 kinesiske statsborgarar reist for å kjempe for Russland i Ukraina, skriv Reuters.

Tysdag informerte Ukraina om at dei hadde teke to kinesiske statsborgarar til fange, og ville utveksle dei med ukrainske fangar på russisk side. USA har stadfesta at dei kjenner til at det er to kinesiske fangar i Ukraina. Det er truleg frivillige framandkrigarar, ifølgje tryggingsekspert Tor Bukkvoll.

Kina nektar for at 155 kinesiske framandkrigarar er i Ukraina, og seier ifølgje Dagbladet at det er ei grunnlaus skulding frå Ukraina. Russland har ikkje kommentert påstanden.

✨Lyspunkt✨: 40 prosent av elektrisiteten kom frå fornybar energi i fjor

Over 40 prosent av elektrisiteten i verda kom frå fornybare kjelder i 2024. Det viser ein ny rapport frå tankesmia Ember. Talet var på 39,4 prosent i 2023.

Spesielt energi frå solkraftverk blir viktigare, og bidreg med 7 prosent av all elektrisitet i verda. Industrien har dobla seg dei siste tre åra.

Det er fyrste gong sidan 1940-talet at ein så stor del av elektrisiteten kjem frå fornybar energi, skriv BBC. Vasskraft var avgjerande då, og står i dag for 14 prosent av verdas elektrisitet.

Vil du få «Vekas viktigaste» rett i innboksen?

Nyheitsbrevet kjem fredag morgon. Dersom du vil at vi skal fjerne deg frå lista er det berre å klikke på avabonner nedst i e-posten.