Filmmelding for sosiale medium

Når du skal laga video med filmmelding for sosiale medium, startar du på same måte som om du skal skriva ei filmmelding.

Du kan bruka dei same omgrepa, orda, språklege bileta, verkemidla og ikkje minst: formidla kva DU synest, med forklaring på kvifor.

Hugs: Tittel på filmen, kort oppsummering, kva du likte, noko spesielt ved opplevinga og oppsummering.

• Les meir her: Slik skriv du filmmelding

Samstundes er det litt annleis å laga melding for video, fordi det er fleirmedialt. Du skal snakka, og du har fleire verkemiddel å bruka: du som snakkar på voice over eller rett i kamera, klipp og lydar frå videoen, tekst på skjermen og teksting av innlegget.

Nedst i saka finn du døme på filmmeldingar i sosiale medium.

Her kjem tips for å laga filmmelding for sosiale medium:

Skriv ned meldinga di

Det kan vera lurt å skriva meldinga først, sjølv om du skal prate anten med eller utan manus. Dette gir deg eit overblikk over kva du ønsker å seia, og du kan øva og flytte tekst og delar, utan at du må klippe masse video.

Kort ned manuset

Når du har skrive ut heile meldinga, er det lurt å korta ned og fjerna det unødvendige. På sosiale medium tenker ein gjerne at det bør vera maks eitt minutt langt. Det inkluderer både det du sjølv seier og eventuelle klipp frå filmen.

På YouTube har du lengre tid. Tilpass deg formatet du skal publisera i.

Når du lagar eit manus for ein video til sosiale medium, avheng det av kor lang videoen skal vera. Her er ein generell retningslinje:

• 60 sekund: Maks 150 ord
• 1–2 minutt: 150–300 ord

Hugs at ord ikkje bør fylle heile tida – du treng pausar for at det ikkje skal bli for travelt og at bodskapen skal nå fram. Vurder å ta inn visuelle element og teksting som kan supplera manus, så det ikkje berre er stemma di som ber videoen.

Tips: Skrive kortare enn du trur, og test alltid høgtlesing for å sjekka tempoet!

Ver naturleg

I ei filmmelding er det viktig at du deler dine meiningar, så lenge du underbygger dei og forklarer. Skal filmmeldinga vera på video er det endå viktigare å gjera det munnleg og prata slik som er naturleg for deg.

Hugs: Dine personlege reaksjonar er det som engasjerer sjåarane og gjer det truverdig.

Opptak

Når du skal spela inn videoen er det aller best om du greier å sjå i kamera mens du pratar.

Du kan øva inn manuset på førehand, og så seia om lag det same når du filmar. Du kan lesa 1–2 setningar frå manuset og så gjenta det med augo i kamera, og så klippa ut når du ser på manuset til slutt. Det finst også «teleprompter»-funksjonar i fleire videoredigeringsappar som let deg lesa mens du ser i kamera. Det beste er nok likevel å ikkje lesa direkte opp, men snakka som du ville gjort til ein ven.

Tips: Det er lurt å stå når du pratar, og du må gi meir energi enn du trur for at det skal kome gjennom skjermen.

Hugs: Pust og ta pausar. Om du seier feil er det berre å starta på byrjinga av setninga igjen og klippa bort feil etterpå. Du kan ha ei liste med stikkord å sjå på innimellom, framfor eit ferdigskrive manus som du les opp ord for ord.

Hugs: Stå langt nok unna kamera til at det er litt plass rundt hovudet ditt, slik at du har plass til tekst og redigering etterpå.

Tips: Dersom du ikkje ynskjer å visa ansiktet ditt eller filma deg mens du pratar til kamera, kan du spela inn ein voice over og til bruka bilete eller klipp frå filmen som det visuelle.