Kunnskapsministeren vil la lærarar gripe inn fysisk mot utagerande elevar
Viss ein elev utagerer i klasserommet, bør læraren kunne ta tak i og føre eleven ut, meiner regjeringa. Dei får støtte frå Frp.
Fredag kjem Kunnskapsdepartementet med eit nytt lovforslag der dei ber om at lærarar skal kunne – ved «ekstreme situasjonar med ordensforstyrringar eller verbale angrep» – få lov til fysisk å gripe inn og føre eleven ut av klasserommet.
– Og det er også fordi resten av elevane har rett på læring, og rettane deira må også bli respekterte, seier kunnskapsminister Kari Nessa Nordtun (Ap) i NRKs «Politisk kvarter».
Framstegsparti-leiar Sylvi Listhaug seier at ho og partiet kjem til å støtte alle forslag som «gir læraren tilbake autoriteten i klasserommet».
– Men det eg også skulle ønskje, var at dei gjorde noko med moglegheitene til å starte private skular, seier ho.
– Vi ønskjer meir fridom til elevane. Kvifor er det så gale viss barnet ditt er god i fysikk eller kjemi at dei då kan gå på eit privat realfagsgymnas?
Det vil ikkje Nordtun og Ap ha noko av.
– Nei, eg fryktar det gir oss svenske tilstandar. Det ser vi i Sverige, der dei har fleire privatskular og delar kvarandre inn etter kven dei er, kven foreldra er og kor mykje dei tener og så vidare, seier ho.
