Vekas viktigaste: Energipakke, barneekteskap og adopsjonskritikk

Regjeringa behandlar EUs energipakke

Torsdag starta regjeringa behandlinga av tre direktiv, som er ein del av EUs fjerde energimarknadspakke. Dette er EU sitt nye regelverk for rein og fornybar energi, som tredde i kraft i 2021.

Det som vert behandla av regjeringa er:

• Fornybardirektivet
• Bygningsenergidirektivet
• Energieffektiviseringsdirektivet

Arbeidarpartiet går inn for endringane, sjølv om regjeringspartnarane i Senterpartiet er sterkt imot. Det kan bety regjeringskrise, som kan føra til at Senterpartiet trekker seg. Torsdag hadde begge partia hastemøte.

Senterpartiet vil venta med saka til etter valet og åtvarar om at det vil gjera Noreg til ein fullverdig medlem av den europeiske energimarknaden.

– Det vil svekkja nasjonal kontroll med straumpolitikken og svekkja moglegheitene for låge og stabile straumprisar i Noreg, seier Marit Arnstad (Sp) til NRK.

Noreg får kritikk for utanlandsadopsjonar

Adopsjonsutvalet kritiserer norske myndigheiter og foreininga Adopsjonsforum for adopsjonar frå Ecuador og Colombia.

Det kjem fram i ein delrapport, som vart levert barneminister Kjersti Toppe (Sp) denne veka.

Utvalet løftar ei konkret sak som er omtalt i VG. Camilla Austbø (37) vart kidnappa og adoptert til Noreg. Då saka vart kjent overførte Utanriksdepartementet og Adopsjonsforum pengar til Ecuador, som fråfall kravet om å få jenta tilbake.

Adopsjonsforum får kritikk for å ikkje undersøka adopsjonane godt nok, og får saman med styresmaktene kritikk for å freista å dekkja over sakene.

– Me vil først og fremst beklaga på det sterkaste den urett som har blitt gjort mot dei involverte. Adopsjonsforum tek kritikken på det djupaste alvor, sa dagleg leiar Sidsel Elie Aas til VG.

Vekas lyspunkt: Barn kåra «kindness» til årets ord

Forskarar spurde 6000 britiske barn i alderen 6–14 år om kva dei meinte var årets ord for 2024.

Dei tre finaleorda vart kindness, artificial intelligence og conflict, som vart rangert i den rekkjefølgja.

Borna uttrykte at det var stort behov for å vera snillare med kvarandre, sett i lys av alt det negative som føregår.

– Me veit frå tidlegare år at unge er veldig bevisste på store saker som kan splitta oss som samfunn og samstemte med den viktige rolla språk kan spela i å bringa folk saman. Dette valet signaliserer noko meir personleg, ei bevisstheit rundt psykisk helse og dei skjulte utfordringane andre kan stå overfor, seier Andrea Quincey, som er ansvarleg for barneinnhaldet til Oxford University Press.

Over halvparten uttrykte òg entusiasme og positive kjensler knytt til kunstig intelligens (artificial intelligence).

Barna stemte òg fram sine tre favorittuttrykk, som vart slay, sigma og skibidi.