Vekas viktigaste: Syklon, valdtektsdom og «Ibelin»-pris

Les deg opp på nokre av sakene som har prega nyheitene den siste veka.

Birgitte Vågnes Bakken
Publisert 20.12.2024 08:12

Aust-Afrika råka av dødeleg syklon

Den franske øya Mayotte vart førre helg treft av ein syklon som har ført med seg enorme øydeleggingar. Mayotte ligg vest for Madagaskar i Det indiske havet, og er eit fransk departement og oversjøisk region.

Store delar av øya er utan kommunikasjon, vegar er øydelagde og sjukehuset og flyplassen har fått store skadar.

Syklonen Chido bevegde seg vidare mot fastlandet, og per 18. desember er 45 personar stadfesta døde i Mosambik og 13 personar i Malawi, ifølgje FN.

Så langt er 22 personar stadfesta omkomne på Mayotte, men fordi styresmaktene reknar med at det er kring ein fjerdedel ulovlege innvandrarar på øya fryktar dei det er fleire tusen. Ifølgje Røde Kors var det torsdag om lag 100 000 personar det ikkje var gjort greie for. No fryktar styresmaktene på Mayotte svolt, sjukdom og meir kriminalitet etter syklonen, melder NRK.

Slik såg det ut etter at Mayotte vart råka av den verste syklonen i området på nesten eit hundreår. | Foto: UIISC7/Securite Civile via AP

Israel vil dobla busettingar i Syria

Israelske styresmakter har godkjent planar om å utvide busettingane på Golanhøgda. Golanhøgda ligg i Syria, men har vore okkupert av Israel sidan 1967. I 1981 annekterte Israel området, som vil seie at dei har erklært det som sitt. Det er om lag 20 000 israelske busettarar i området i dag. Annekteringa av Golanhøgda strir med folkeretten. No vil Israel doble busettingane.

Israelske styrkar har òg teke seg inn i buffersona mellom Israel og Syria som blir overvaka av FN. Dei har angripe hundrevis av mål i Syria etter at Assad-regimet vart styrta førre veke. Israel grunngjev åtaka med krigen og den nye fronten i Syria, skriv NTB.

Ein syrar viftar med eit kvitt flagg mot israelske soldatar som har tatt over ein forlatt syrisk militærbase nær grensa til Israel. | Foto: AP Photo/Hussein Malla

Dom i fransk massevaldtektssak

Torsdag kom dommen i massevaldtektssaka i Frankrike. Dominique Pelicot (72) vart dømt til 20 år i fengsel. Han er dømd for å ha dopa ned og valdteke kona Gisèle Pelicot (72). I tillegg arrangerte han overgrep mot kona av andre menn som han rekrutterte via Internett.

Gisèle skal ha blitt valdteken rundt 200 gonger mellom 2011 og 2020. Ho var ikkje sjølv klar over at det skjedde. Politiet fann videoar av overgrepa etter at den dåverande ektemannen blei tatt for å fotografere under skjørta til kvinner på ein supermarknad.

50 andre menn er òg dømde til mellom tre og 15 år i fengsel.

Gisèle valde å sta fram og insisterte på at saka blei ført for open rett. Ho ønsker å hjelpe andre kvinner som har blitt usette for seksuelle overgrep, skriv Reuters.

Dominique Pelicot erkjente i september straffskuld og innrømma at han var ein valdtektsmann, skriv VG.

Gisèle Pelicot snakkar med pressa på veg ut av retten i Avignon i Sør-Frankrike 19. desember. | Foto: AP Photo/Lewis Joly

38 personar drepne i Noreg i 2024

Ei oversikt frå Aftenposten syner at 38 personar er drepne i Noreg så langt i år. Desse er fordelt på 31 drapssaker. Over halvparten av offera blei drepne av nokon i nær relasjon, kjem det fram i Aftenposten sine undersøkingar.

I 2023 var det fleire drap i Noreg enn på ti år, med 38 offer i 35 drapssaker. Kripos frykta i slutten av mars, etter at 20 personar var drepne, at 2024 ville få enda fleire drap. Etter nokre månader med færre eller ingen drap, vart fem personar drepne i desember.

I førre veke vart ei kvinne og eit barn drepne på Gjerdrum. Mannen og faren har erkjent straffskuld. Nokre dagar seinare drap ei kvinne mora og broren sin i Ski. Også ho har erkjent straffskuld. 17. desember vart ei kvinne funnen død i Stjørdal, og ein mann er sikta for drap, skriv Aftenposten i saka.

Politiet gjer undersøkingar i ein bustad og eit område i Gjerdrum etter at ei kvinne vart funnen drepen. | Foto: Javad Parsa / NTB

Pendlarbustad-dom

Espen Teigen er dømt til ni månader fengsel for grovt bedrageri etter pendlarbustadsaka. Han er tidelgare politisk rådgjevar for Sylvi Listhaug (FrP) og skal ifølgje tiltalen ha lurt til seg pendlarbustad som han ikkje hadde krav på. Teigen skal ha spart rundt 400 000 kroner på det.

Teigen erkjente straffskuld og har uttalt at han ønsker å ta ansvar for ein feil han som 23-åring gjorde som fersk politisk rådgjervar.

Aktor bad om elleve månader fengsel, men han vart dømt til ni månader.

Teigen, som i dag er journalist for Document.no, skriv på X at han skal diskutere med forsvararen om han vil anke dommen.

Espen Teigen var tidlegare politisk rådgjevar for Sylvi Listhaug. No er han dømt for grovt bedrageri i samband med pendlarbustadsaka. | Foto: Ole Berg-Rusten / NTB

Mads "Ibelin" Steen døydde av ein muskelsykdom då han var 25 år gammel. Etter at det i år kom ein dokumentarfilm om livet hans, har han og familien blitt kåra til «årets namn» i VG. | Foto: Medieoperatørene / handout / NTB

Vekas viktigaste: Syklon, valdtektsdom og «Ibelin»-pris

Aust-Afrika råka av dødeleg syklon

Israel vil dobla busettingar i Syria

Dom i fransk massevaldtektssak

38 personar drepne i Noreg i 2024

Pendlarbustad-dom

«Ibelin» kåra til årets namn i VG

Relaterte saker

Vekas viktigaste: Fritt Syria, samarbeidsbrot og hylla drapsmann

Vekas viktigaste: Ny abortlov, unntakstilstand i Sør-Korea og kvinneleg president i Namibia

Vekas viktigaste: Våpenkvile, sosiale medium-forbod og sjukefråvær