Vekas viktigaste: Ny abortlov, unntakstilstand i Sør-Korea og kvinneleg president i Namibia

Ny abortlov i Noreg

Eit fleirtal i Stortinget stemte for det nye abortlovforslaget på tysdag. Den tidlegare abortlova vart innført i 1975 og har ikkje vore endra sidan då.

Dette er hovudendringane i lova:

• Grensa for sjølvbestemt abort aukar frå veke 12 til veke 18 i svangerskapet.
• Nemndene frå veke 12 til 18 blir fjerna.
• Nye nemnder skal vurdere søknader etter veke 18. Desse skal ha eit fleirtal av kvinner.
• Fosterreduksjon, også kalla tvillingabort, blir sjølvbestemt. Dette blir i dag bestemt av nemnd.
• Retten til rettleiing, informasjon og oppfølging frå kommunal og regional helseteneste blir lovfesta.
• Reservasjonsrett for helsepersonell mot å gjennomføre abort blir lovfesta.

Regjeringa skal evaluere lova etter fire år.

Framstegspartiet, Høgre og Senterpartiet fristilte representantane sine då dei skulle stemme over forslaget. Det vil seie at kvar enkelt kunne stemme ut frå eige synspunkt, utan omsyn til partiet sitt.

Les meir: Stortinget stemde for å utvide retten til sjølvbestemd abort

Rekordlåg måling for Arbeidarpartiet

I ei ny måling frå TV 2 er Frp det største partiet i Noreg med ei oppslutning på 24,1 prosent, med Høgre på andreplass med 23 prosent. Arbeidarpartiet fell til 16,5 prosent.

Dette er den siste i ei rekke målingar der regjeringspartiet har gjort det dårleg, og har ført til diskusjonar om Jonas Gahr Støre er eigna som partileiar.

Ifølgje VG skal fleire sentrale arbeidarpartipolitikarar ha bede Støre om å trekke seg, slik at det kunne vere klar ein ny leiarkandidat i god tid før landsmøtet i april.

Nestleiar Jan Christian Vestre, arbeidsminister Tonje Brenna og kunnskapsminister Kari Nessa Nordtun har gått ut og sagt dei støttar Støre som partileiar og statsminister. LO-leiar Peggy Hessen Følsvik har også annonsert støtte til statsministeren.

Av 15 fylkesleiarar er det ifølgje VG fire som gir aktiv støtte til Støre, medan ti let vere å svare.