Vekas viktigaste: Våpenkvile, sosiale medium-forbod og sjukefråvær

Australia forbyr sosiale medium for barn

Som første land i verda forbyr Australia barn under 16 år å bruke sosiale medium, melder VG.

Torsdag godkjente overhuset i den australske nasjonalsamlinga lovforslaget, med 102 stemmer for og 13 stemmer mot.

Det vil dimed vere ulovleg for dei som er under 16 å bruke mellom anna TikTok, Snapchat, Instagram, Facebook, Reddit og X.

Plattformene får eit år på seg til å finne ut korleis dei skal handheve forbodet, og dei risikerer bøter på opptil 50 millionar australske dollar (om lag 360 millionar kroner) om dei ikkje gjer det.

Ein million menneske utan straum i Ukraina

Over ein million ukrainarar var torsdag utan straum etter russiske åtak, melder Reuters.

Russland bomba energiverk og straumforsyningar i Ukraina. For å verne om straumnettet har den statlege nettoperatøren skrudd av straumen i fleire regionar, skriv NRK.

Samstundes er temperaturen i store delar av Ukraina under null grader no. Det er ikkje første gong Russland går etter straumnettet og etterlet sivile utan varme. Ukraina har tidlegare skulda dei for «energiterror».

Den russiske presidenten Vladimir Putin har sagt at bombinga er eit svar på ukrainske åtak med vestlege langdistansevåpen.

Sjukefråværet held fram med å auke

Torsdag la Statistisk sentralbyrå (SSB) og Nav fram tala for sjukefråvær i tredje kvartal, altså for juli, august og september. Tala deira syner at sjukefråværet auka med 1,6 prosent, til 7,19 prosent, melder NTB.

Sjukefråværet omfattar både eigenmeldingar og sjukemeldingar.

– Dette er det høgaste legemelde sjukefråværet i eit tredje kvartal sidan 2009, då det var svineinfluensa. Det har vore ein auke både i antal sjukemelde og antal sjukefråværsdagar, seier arbeids- og velferdsdirektør Hans Christian Holte, ifølgje VG.

Holte er glad sjukefråveret i tredje kvartal ikkje auka like mykje som tidlegare i år, men understrekar at vi framleis er på eit svært høgt nivå i Noreg. Nesten åtte millionar dagsverk gjekk tapt til legemeldt sjukefråvær i tredje kvartal, skriv VG.

– Det er framleis vekst i sjukefråvær med psykiske lidingar, og i tredje kvartal var det i tillegg ein uvanleg vekst i sjukefråvær med luftvegssjukdommar, seier Holte til NTB.

Arbeids- og inkluderingsminister Tonje Brenna (Ap) uttalar til nyheitsbyrået at Noreg ikkje har råd til at fråværet held fram på dette nivået over tid.

Vekas snakkis: Rekordsal av norsk måleri

Måleriet Kvitebjørn kong Valemon av Theodor Kittelsen vart seld på aksjon for rekordsummen 36 millionar kroner denne veka. Den tidlegare rekorden for eit norsk måleri var på 14 millionar, skriv NRK. Også det var eit Kittelsen-bilete.

Biletet frå 1912 med motiv frå eventyret til Asbjørnsen og Moe, var privateigd før auksjonen. Nasjonalmuseet ville gjerne kjøpe biletet, men ha ikkje råd. Dei håpar at den som har kjøpt biletet vil gjere det tilgjengeleg for offentlegheita.

Det er førebels ikkje kjent kven som har kjøpt måleriet.