KrFU-leiaren meiner kristne verdiar er i fare – vil stenge ute islamistar

I det siste har fleire frå Noregs kristendemokratiske politiske fløy engasjert seg i kontroversielle verdidebattar. Tidlegare i sommar uttalte Bjuland at «tradwife»-trenden var positiv. No seier han at KrF må ta innover seg at vi lever i nye tider og han tek eit klart standpunkt mot radikal islam. For å løyse problemet foreslår han å stengje grensene for radikale islamistar, skriv Aftenposten.

– Det er heilt klart at vi må ta tak i elefanten i rommet. Radikale islamistar har fundamentalt andre verdiar enn dei kristne, vestlege verdiane som landet vårt er bygd på. Desse verdiane må vi stå opp for, seier Bjuland.

KrFU-leiaren meiner at problema er tydelege i det norske samfunnet. Han peikar på aukande ungdomskriminalitet, polarisering og rapportar om veksande antisemittisme.

Han viser også til naboland i Europa som døme på korleis han fryktar situasjonen kan utvikle seg i Noreg:

– Vi kjem ikkje unna at det finst miljø innan islam som har heilt andre haldningar til andres religionar og verdiar, og som uttrykkjer seg på andre måtar, seier han og held fram:

– Dei snakkar om vald og menneskeliv på ein heilt annan måte enn vi gjer i Vesten. Det er heilt usmakeleg og skremmande.

Bjuland meiner at det er dei kristne verdiane i samfunnet som legg til rette for at ulike menneskegrupper kan sameksistere.