Ung forskar kåra til «TIME’s kid of the year»

Heman Bekele (15) har utvikla ei såpe som skal førebyggja utvikling av hudkreft.

Andrea Rygg Nøttveit
Publisert

info

Denne artikkelen er eldre enn 1 år gamal. Det betyr at noko av informasjonen kan vere utdatert.

– Eg kom berre på ein idé. Eg jobba med den idéen og fekk til å setja idéen ut i livet, seier Heman Bekele til TIME Magazine.

Det amerikanske magasinet TIME har nyleg kåra 15-åringen til «Årets barn».

Heman kom til USA frå Etiopia saman med foreldra sine då han var fire år gamal. Han har alltid vore interessert i forsking og starta tidleg med eigne eksperiment.

Då den unge guten lærte om farane knytt til hudkreft som følgje av UV-stråling frå sola, vart han inspirert til å jobba for ei behandling.

I fjor vann Heman ein forskarkonkurranse med idéen sin om ei såpe som brukar eit stoff som skal hindra utvikling av hudkreft på eit tidleg stadium.

– Akkurat no er det ingen rimelege tilgjengelege alternativ til den veldig dyre behandlinga på marknaden, forklarar Heman til TIME.

Tanken er at dei fleste brukar såpe og vatn til å vaske seg med, og målet er å utvikla ei såpe som let eit kjent stoff som kan behandla hudkreft, hengja att på huda etter at du har vaska deg. Denne idéen har Heman no fått hjelp til å jobba vidare med i eit ekte laboratorium.