Nesten alle grunnskular har mobilforbod
96 prosent av grunnskulane i Noreg har no innført restriksjonar på mobilbruk. Kunnskapsministeren meiner dette har svært positive effektar.
Det kjem fram i undersøkinga «Spørsmål til Skole-Norge». I tillegg svarer 64 prosent av skuleleiarane i vidaregåande at det er innført restriksjonar i ordensreglementet på skulen deira som avgrensar tilgang til og bruk av mobiltelefonar og smartklokker.
I februar kom ein rettleiar frå Utdanningsdirektoratet som tydeleg tilrår å regulere tilgang til mobiltelefonar i skulen, etter at kunnskapsministeren bad Utdanningsdirektoratet om å utarbeide nasjonale tilrådingar.
– Eg er veldig fornøgd med at mobilen no ikkje lenger har ein plass i norsk skule. Inntrykket mitt så langt er at mobiltilrådinga har hatt svært positive effektar. Nesten dagleg høyrer eg historier om meir samhald, meir fysisk aktivitet og betre konsentrasjon, seier kunnskapsminister Kari Nessa Nordtun (Ap).
Fleire skular hadde hatt ei form for restriksjonar før dei nasjonale mobiltilrådingane kom. No har fleire kommunar, blant dei Oslo, endra felles ordensreglement for alle skulane i kommunen sin, i tråd med dei nye tilrådingane.
