Vekas viktigaste: Europeisk naturlov, borgarvern og likekjønna ekteskap

«Pedojegar»-nettverk spreiar video av overfall

Ein video av ein mann som skal ha blitt overfallen og knivstukken av ein 14-åring i Luster i Sogn, er sett over 80 000 gongar. Videoen har blitt spreia av ei gruppe som kallar seg «pedojegarar», som hevdar dei lokkar vaksne inn i overgrepsfeller. 14-åringen i videoen skal ha vore med i nettverket.

Mannen som vart stukken med kniv, er sikta for seksuell omgang med eit barn under 16 år. Ein 14-åring er sikta for drapsforsøk, og tre 15-åringar er sikta for medverking til drap, og politiet meiner motivet er overgrepssiktinga til mannen.

Politiet er bekymra for bruken av vald frå ungdommar som er involvert i slike nettgrupper, og at det tek ressursar frå politiet når grupper bestemmer seg for å drive med borgarvern.

– Politiet må drive etterretning, etterforsking og førebygging mot personar som har gjort seg skuldig i eller utgjer ein risiko for å gjere seg skuldig i alvorleg vald. Nokre borgarverngrupper kan falle inn under denne kategorien, seier Guro Skjerve, leiar for etterretningsseksjonen i Kripos til VG.

Ho fortel at det gjer at politiet brukar kapasitet dei kunne brukt for å hindre og etterforske seksuelle overgrep mot barn.

EU skal verne 20 prosent av mark og våtmark

Måndag stemte miljøministrar frå 20 EU-land for naturrestaureringslova.

Lova inneber at EU-landa har to år på seg til å leggje fram planar for korleis dei skal restaurere 20 prosent av øydelagt mark og våtmark innan 2030.

Forslaget har møtt motstand i fleire land, spesielt frå bønder. Italia, Ungarn, Nederland, Polen, Finland og Sverige er blant dei som stemte mot lova.

Lova følgjer opp lovnadane frå FNs naturtoppmøte i 2022 i Montreal, der landa vart einige om å verne 30 prosent av utvalt natur.

✨Lyspunkt✨: Thailand gjer likekjønna ekteskap lovleg

Som det fyrste landet i Søraust-Asia, har Thailand godkjent likekjønna ekteskap. Nasjonalforsamlinga stemte for den nye lova på tysdag, og det må no bli signert av den thailandske kongen, Maha Vajiralongkorn.

120 dagar etter dette kjem lova til å tre i kraft, og likekjønna personar kan gifte seg med kvarandre.

Likekjønna ekteskap er berre lov i to andre asiatiske land, Nepal og Taiwan.