Nordlendingane er mest bekymra for krig
I aldersgruppene 18 til 50 år svarer rundt 40 prosent at dei fryktar krig eller invasjon, ifølgje ei undersøking.
44 prosent i dei nordlegaste fylka fryktar at krig eller invasjon kan skje i Noreg, medan andelen er 35 prosent for landet samla sett. Det viser ei måling Norstat har gjort for NRK.
– Det er naturleg at denne frykta er noko større i nord, fordi Russland grensar til våre nordområde, seier førsteamanuensis Tom Røseth ved Forsvarets høgskole.
Yngre er meir bekymra enn eldre. I aldersgruppene 18 til 50 år svarer rundt 40 prosent at dei fryktar krig eller invasjon, medan andelen er nede i 20 prosent for dei som er 80 år eller eldre.
I undersøkinga er 1000 personar spurde om kva dei fryktar kan skje i Noreg.
Cyberangrep på kritisk infrastruktur er trusselen flest peikar på (60 prosent). Deretter følgjer langvarig straumbrot (55 prosent), ekstremvêr (51 prosent), terrorangrep (50 prosent) og pandemi eller alvorleg sjukdomsutbrot (48 prosent).
