Vekas viktigaste: Flaum i Brasil, trugslar om våpenstans og meir fornybar energi

Stiller spørsmål ved PST og justisministeren si handtering av Oslo-skytinga

Tysdag 7. mai kom stortingets kontroll- og konstitusjonskomité med innstillinga si der dei vurderer handteringa av Oslo-skytinga 25. juni i 2022. Komitéen har brukt 25. juni-rapporten som vart publisert i fjor i arbeidet sitt.

Både justisminister Emilie Enger Mehl (Sp) og Politiets tryggingsteneste (PST) får fleire merknader i innstillinga. Eit fleirtal av komitéen stiller spørsmål ved kvifor PST ikkje oppretta førebyggjande sak mot Zaniar Matapour, som gjennomførte skytinga, sidan dei var kjende med haldningane hans før skytinga.

Fleirtalet kritiserer også kor sein Mehl var med å følgje opp det skeive miljøet etter skytinga.

– Trass i gjentekne førespurnader gjekk det nærare eitt år før statsråden arrangerte eit møte med dei skeive organisasjonane som var ramma av åtaket, seier komitéleiar Peter Frølich (V) til VG.

E-tenesta meiner dei derimot gjorde jobben sin ved å varsle vidare om funna sine. Komitéen rosar også politiet si handtering av hendinga, og enkeltmenneska som greip inn.

No tilrår dei at Stortinget set i gang oppfølgingsforsking av pårørande, og at justisministeren greier ut om 25. juni-rapporten for Stortinget.

1,4 millionar menneske råka av flaum i Brasil

Det sørlege Brasil er råka av ein flaum der minst 95 personar har omkome og over 130 er sakna. Ifølgje delstaten Rio Grande do Sul er dette den verste naturkatastrofen dei har blitt råka av nokosinne.

1,4 millionar menneske er påverka av flaumen, og det er vanskeleg for hjelpearbeidarar å kome fram med reint drikkevatn til desse. Dei fleste bur i byen Porto Alegre, der fem av dei seks vassbehandlingsanlegga har slutta å fungere.

Å koma til med naudhjelp har også blitt vanskeleg fordi båtar har blitt stole. Byen ber lokale med tilgang på båt om å stille dei til disposisjon for hjelpearbeidarar.

Flaumen kjem etter fleire dagar med styrtregn, som har ført til at elvene har gått over breiddene sine.