Russiske Røde Kors vert kopla til Putin: – Tar saka på stort alvor
– Nøytraliteten og uavhengigheita til Røde Kors-foreiningane er det viktigaste verktøyet vårt, seier Øistein Mjærum i Norges Røde Kors.
Den russiske greina av Røde Kors (RRK) har vorte kopla til Putin, Kreml og den russiske propagandamaskina, skriv The Guardian. Avisa peiker på at:
• RRK-presidenten har ei sentral rolle i ein «patriotisk», pro-Putin-organisasjon.
• Høgtståande tilsette i RRK har snakka om at det er umogleg å slutte fred med «ukrainske nazistar».
• RRK har teke del i militærtrening for born.
Lekne dokument har dessutan avslørt at Kreml planlegg å erstatte det internasjonale Røde Kors-arbeidet på russisk-okkupert territorium i Ukraina, ved å finansiere nye marionette-organisasjonar.
Nøytralitet, upartiskheit og uavhengigheit
Den internasjonale Røde Kors-rørsla er no under press for å ta grep mot den russiske avdelinga. Viktige prinsipp for Røde Kors er nøytralitet, upartiskheit og uavhengigheit.
Det internasjonale forbundet av Røde Kors- og Røde Halvmåneforeiningar (IFRC) har makt til å ta disiplinære grep eller å suspendere medlemskap til nasjonale foreiningar som bryt med prinsippa til organisasjonen.
Har kontakt med IFRC
Øistein Mjærum, direktør for kommunikasjon og samfunn i Norges Røde Kors, skriv i ein epost til Framtida at dette er ei sak dei tek på stort alvor.
– Nøytraliteten og uavhengigheita til Røde Kors-foreiningane er det viktigaste verktøyet vårt for å kunne hjelpe folk som treng humanitær hjelp, spesielt i dei mest krevjande situasjonane, skriv han.
Han meiner det kan føre til alvorlege konsekvensar, eller at ein ikkje får gjort jobben sin, dersom styresmakter forsøker å påverke Røde Kors sine prioriteringar.
Mjærum fortel at dei no er i kontakt med IFRC om denne saka. IFRC held på med å gå nøye gjennom påstandane i artiklane, og følger spørsmåla opp med det russiske Røde Kors, skriv Mjærum.
