Runa og Lars sine beste reisetips
Kjærasteparet deler tips til destinasjonar og sparing.
Framtida har tidlegare skrive om Runa Tranøy Aasheim og Lars Lorentzen Kverne som brukar 20-åra på å prioritere reising. Dei har mellom anna vore på safari i fleire land i Afrika, svømt med hai på Hawaii og vore på backpacking i Thailand.
Her deler det drevne, reiselystne paret sine beste reisedestinasjonar, og gir råd til korleis ein kan spare til større reiser.
Beste reisedestinasjonar
1. Maldivene
– Eit dykke- og snorkleparadis. Nydelege strender og sandbankar.
2. Hawaii
– God mat, nydelege strender og haidykking. Her dykka me med Galapagoshaiar utan bur, vår største draum!
3. Thailand
– Første landet me blei forelska i. Nydelege folk, god mat og fine dykkemogelegheiter. Me har vore her tre gongar.
4. Namibia
– Eit unikt land. Safari, ørken og nydeleg landskap. Me kjørte gjennom Namibia til Zimbabwe i tre veker, og sov i telt på taket på bilen.
Beste sparetips
1. Last ned spareappen Dreams
– Den stel små beløp frå kontoen utan at du merkar det.
Runa og Lars nyttar spareappen “Dreams” for å spare til reisane. Foto: Privat
2. Shoppestopp
– Det er vanskeleg å ikkje vere ein del av «shoppesamfunnet», men dette har gjort at me kan spare store delar av lønninga på grunn av lite forbruk.
3. Jobbe mykje
– Har du mogelegheit til å jobbe overtid, er dette gull.
4. Me flytta frå Oslo til heimstaden Stord grunna høge prisar
– Me kan spare mykje meir av løna når me bur på Stord.
5. Det kan løne seg å binde seg til ein flyallianse – for å spara pengar der
– Me fekk reise gratis på businessclass til Afrika, fordi me hadde spart SAS-poeng. Veldig smart!
6. Spar saman
– Bli einige om eit fast beløp som skal gå til sparekonto. Det går mykje fortare om ein sparar saman, og det er meir motiverande å sjå at beløpet stig.
