Medietilsynet gjev 41 millionar i støtte til samiske aviser
Støtta blir fordelt mellom fire aviser som har den samiske befolkninga i Noreg som målgruppe.
Denne artikkelen er eldre enn 1 år gamal. Det betyr at noko av informasjonen kan vere utdatert.
– Nøgd med tilskota
Redaktør i Ságat, Geir Wulff fortel at tilskotet gjev avisa ei auke på eit par hundre tusen kroner, samanlikna med tidlegare år.
– Me er veldig nøgd med tilskota som no kjem frå Medietilsynet, dei sørger for at me kan halda fram med produksjonen vår, seier Wulff.
– Me er spesielt glade for at tilskota kjem så tidleg som dei gjer no, i tidlegare år har ikkje fordelinga av midlane vore klar før eit stykke uti desember. At fordelinga no er klar betyr at me har meir føreseielegheit og kan betre planleggja det kommande året, fortel redaktøren.
Støtteordninga skal legga til rette for demokratisk debatt, meiningsdanning og språkutvikling i det samiske samfunnet.
Aviser med samiske sider
– Støtta bidreg til å gjera dei samiske skriftspråka meir synlege, seier avdelingsdirektør i Medietilsynet, Hanne Sekkelsten i ei pressemelding.
To andre aviser får pengar frå denne potten, dei får støtta for å produsera avissider på samiske språk. Altså ikkje heile aviser på samisk, men enkeltsider i ei avis som elles bruker norsk.
Snåsningen, som produserer avissider på sørsamisk får 731 929 kroner og NordSalten Avis, som lagar innhald på lulesamisk får 914 911 kroner.
NordSalten Avis hadde opphaveleg òg søkt om tilskot til å produsere eigne aviser på samisk, men fekk avslag på søknaden. Avslaget kom etter ei vurdering av hovudmålgruppa, der Medietilsynet konkluderte med at NordSalten ikkje har den samiske befolkninga som hovudmålgruppe.
