Unge Høgre-leiaren tek sjølvkritikk for Greta Thunberg-kommentar
Leiaren i Unge Høgre, Ola Svenneby, har fått kritikk for ein kommentar om at generasjon Greta Thunberg er død etter skulevalet. No tek han sjølvkritikk.
Denne artikkelen er eldre enn 1 år gamal. Det betyr at noko av informasjonen kan vere utdatert.
– Både form, formidling og timing vart feil i år. Tek sjølvkritikk på det. I tillegg til at bodskapen verken kom fram eller var nyansert nok for mange, skriv Svenneby i ein tråd på X/Twitter.
Mange reagerte på Svennebys kommentar etter at skulevalresultata vart klare tysdag. Høgresida vart den store vinnaren i skulevalet, med 21,9 prosent til Høgre og 19,5 prosent til Framstegspartiet.
– Eg trur vi kan erklære generasjon Greta Thunberg død, sa ein euforisk Svenneby til NRK.
Tidlegare SV-leiar Audun Lysbakken var ein av dei som reagerte.
– Herregud. At antiklima har vorte ei mobiliseringssak for høgresida midt i klimakrisa er ganske vilt, skreiv Lysbakken på X/Twitter.
I X-tråden forklarer Svenneby seg no om bodskapen sin:
– Kommentaren min – om enn uelegant – handlar om korleis ein stor del unge har kjent seg feil framstilt og ikkje har fått sine verdiar og saker godt nok representert i mellom anna media. Der alle unge helst har skulla vere radikale, aktivistiske og ultra-progressive, skriv han.
– Ein ser det jo på Twitter i dag. Fleire ytrar nærast ei sorg over at dagens unge ikkje stemmer på MDG.
🧵Tråd om Greta. Rekker ikke svare ut alle, så gjør et forsøk her:
Både form, formidling og timing ble gal i år. Tar selvkritikk på det. I tillegg til at budskapet verken kom frem eller var nyansert nok for mange. 1/
— Ola Svenneby (@OlaSvenneby) September 6, 2023
