Japanarar tek smilekurs etter pandemien
Pandemien og munnbind har gjort at fleire japanarar vil øve andletsmusklane.
Denne artikkelen er eldre enn 1 år gamal. Det betyr at noko av informasjonen kan vere utdatert.
I Japan er det auke i personar som tek smilekurs.
Etter fleire år med pandemi og munnbind, er det tydelegvis fleire som treng å øve på mimikken i andletet sitt.
Radioprogramleiaren Keiko Kawano har sidan 2017 hatt såkalla smilekurs, der elevane kan lære seg korleis dei kan få det perfekte Hollywood-smilet.
No er det fire gongar fleire som tek smilekurset enn det var på liknande tidspunkt i fjor.
– Eg brukte ikkje andletsmusklane mine så mykje i løpet av Covid, så det er ei god øving, seier Himawari Yoshida (20), som tek kurset for å kome lettare i arbeid.
Ein enkelttime med tilbakemeldingar kostar 7700 yen, over 600 kroner, og kundane er alt frå folk som arbeider i salsbransjen til offentlege tenester.
Oppskrifta til Kawano for det perfekte smilet inkluderer blant anna:
- halvmåne-augo
- runde kinn
- å vise fram åtte overtenner
Elevane hennar kan øve på teknikken på eit nettbrett og blir vurdert for kor godt dei smiler.
Foto: Victor Deweerdt, Unsplash.com
