Då Mini Jakobsen (56) var 20 år var det stort sett fotball som fylte kvardagen og draumane for framtida.
Denne artikkelen er eldre enn 1 år gamal. Det betyr at noko av informasjonen kan vere utdatert.
Då Jahn Ivar «Mini» Jakobsen var 20 år, var han nett ferdig på Bodø Gymnas. Han hadde byrja jobba på Aspmyra stadion og spelte for Bodø/Glimt.
– Det gjekk som regel i fotball og å «henge» med kompisar, seier han på spørsmål om kva kvardagen var fylt med i ein e-post til Framtida.no.
Toppscorar og på landslaget
1995: Mini i landslagsdrakt.
Foto: Tor Richardsen / NTB
I Bodø/Glimt vart han toppscorar i kvar sesong han var med i, frå 1984 til 1987. I 1988 vart han kjøpt av Rosenborg, der han igjen vart toppscorar i 1988 og 1989.
Så god var han til å score mål, at utanlandske fotballklubbar fatta interesse, og i 1990-sesongen spelte han for sveitsiske BSC Young Boys.
Han var også innom Duisburg i Bundesligaen og etterkvart belgiske Lierse. Men i 1994 kom han tilbake til Rosenborg og vart verande til 2000.
I tillegg har han vore med på store landslagskampar mellom anna mot USA i 1994 og Frankrike i 1998.
Han spelte 65 landskampar for Noreg og scora til saman elleve mål.
TV-vand sjarmtroll
Mini Jakobsen har sjarmert landet sidan har kom inn i rampelyset. Her frå eit fotball-blad i 1990.
Men han har ikkje berre vore på fotballbana. Allereie i 1989 byrja han i underhaldingsbransjen som programleiar i Minitimen på Radio KonRad.
Året etter ga han og Trøndershowinistan ut «Minisangen» før cupfinalen mot Fyllingen i 1990.
Etter fotballkarriera jobba han som ekspertkommentator på TV 2 (1999-2016). I 1997 var han programleiar for TV-serien Minitimen som vart sendt på TV3.
I år har han vore å sjå på TV-skjermen igjen, først under Farmen kjendis og vidare i Torpet kjendis.
- Visste du at Mini, som eigentleg heitte Jan, bytta namn til Jahn med H, for å heidre favorittartisten: Jahn Teigen.
10 i skuddet og opprykk med Bodø/Glimt
20-årsdagen sin hugsar han ikkje, men han reknar med at det var bursdagsfeiring.
Det sterkaste minne frå tida, hugsar han likevel godt:
– At vi rykka opp med Bodø/Glimt frå 3. til 2. divisjon.
– Kva las du/såg du på/lytta du til?
– Eg er ikkje nokon bokmann, så det vart mest «10 i skuddet» på radio og mykje «moviebox» på kveldstid!
Målet var å bli fotballproff
Kva han skulle bli i livet, stod klart for han:
– Eg var ikkje ein gut som filosoferte så mykje, men målet var å bli fotballproff.
– Kven var den viktigaste personen i livet ditt?
– Ingen på den tida som skilte seg ut
1993: VM-kvalifisering Norge–Tyrkia som Norge vann 3–1. Jahn Ivar Jakobsen alias Mini jublar etter at han scora det tredje målet. Foto: Tor Richardsen / NTB
Om han hadde møtt seg sjølv som 20-åring i dag, ville han tenkt:
– Det var ein liten rappkjefta gut, men han er då blid!
– Kva råd ville du gitt til deg sjølv?
– Lev i nuet og ikkje angre på ting du ikkje har gjort.
Håvard Tvedten debuterte på landslaget i år 2000, og er på bilete i aksjon mot Sveits som 25-åring. I fjor var han å sjå i Mesternes Mester på NRK. Foto: Thomas Bjørnflaten / SCANPIX , Sondre Transeth/Rubicon TV/NRK
