Bergensar Julie Erichsen (18) har kvalifisert seg til OL, og for første gong på 28 år sender Noreg ei dame til OL i turn.
Denne artikkelen er eldre enn 1 år gamal. Det betyr at noko av informasjonen kan vere utdatert.
Sundag kom den endelege stadfestinga: Julie Dicko Erichsen (18) og Sofus Heggemsnes (19) skal til OL i Tokyo til neste år.
Det var Bergens Tidende som først melde dette.
Første kvinne på 28 år
Førre gong ein kvinneleg turnar representerte Noreg var i Barcelona i 1992. Denne gong er det Erichsen som skal representera Noreg, som første kvinne på 28 år.
– Det er eigentleg ganske sjukt. Det var uventa. Det har ikkje sokke inn enno, seier ho til NRK.
Førre veke deltok ho i VM i Tyskland, der ho fekk poengsummane som måtte til for å kvalifisera til OL.
Det er ikkje berre lenge sidan ei kvinne har representert Noreg. Sidan 2000, har me berre hatt med to turnarar i OL. Flemming Solberg i 2000 og Stian Skjerahaug i 2016.
Sofus Heggemsnes (19) og Julie Erichsen (18) har kvalifisert til OL i turn til neste år. Foto: NGTF
Trenar 25 timar i veka
Erichsen konkurrerer i hopp, skranke, bom og frittståande. Skranke er favorittøvinga.
Seks dagar i veka trenar ho, tilrettelagt av toppidrettslinja på Tertnes vidaregåande skule og Olympiatoppen Vest. Klubben ho representerer er Fana IL og Laksevåg TIL.
– Det blir rundt 25 timar trening i veka. Eg startar dagen med trening, så er det skule, og så er det ei ettermiddagsøkt, seier ho til NRK.
Sjå videoen frå VM i Tyskland:
- Les også intervjuet med cheerleader Kine Olsen om kva som skal til for å verte verdsmeister: – For meg var cheerleading det viktigaste. Eg ofra alt det sosiale livet på ungdomsskulen
