Therese Utgård, leiar i Åpen Folkekirke Møre, meiner Pride slett ikkje er skadeleg for born, men ein god «gender flip».
Therese Utgård, lege og leiar i Åpen Folkekirke Møre
Therese Utgård, lege og leiar i Åpen Folkekirke Møre

Innlegget var først publisert hjå Dagbladet.no.

Laurdag var det Oslo Pride-parade, og tusenvis feira kjærleiken. Men samstundes kjem kritiske røyster som meiner Pride viser ei seksualisering som er usunn for born. Eg har tenkt mykje på dette.

Eg skjøner at menn som dansar frå lasteplan, nokre som viser meir hud, andre som kanskje spelar på sex – at det kan vere uvand. Men usunt for born? Nei.

Pride er kanskje heller ein god, og påfallande «gender flip». Gender flip er å ta ein situasjon og byte ut kvinner med menn (og omvendt), for å sjå kor tåpelig noko er.

For vi blir jo utsatt for lettkledde kvinner i det offentlege rom kvar dag! Reklamer og tv-serier som viser seksualisering av jenter langt ned i tenåra, gjerne med eit uoppnåeleg kroppsideal, er så vanleg at vi knapt léer eit augebryn.

Unge jenter er i stor grad misnøgde med kroppen sin

Likevel gjer dette noko med oss. Unge jenter er i stor grad misnøgde med kroppen sin. Mange får psykiske problem, jenter i barneskulen driv med slanking. Og mange jenter og kvinner føler dei må følge idealet dei blir bombardert med: tilgjengelige, pene og helst stille og føyelege.

Og guttane? Dei som alltid må vere barske og sterke? Alltid bør dei vere pågåande, helst ha «gjort det» tidleg i tenåra. Ikkje bør dei gråte eller vise svakheit, berre interessere seg for fart og spenning. Eller trur du gutar som driv med hester, som likar å passe born, har sans for mote – trur du dei får gjere det utan å bli mobba, utan å bli kalla «homo»?

Jo, i paraden ser ein sikkert andre kjønnsuttrykk og kjønnsidentitetar enn ellers. Heldigvis!

Dette kan vere eit godt utgangspunkt for ein samtale med borna

Dette kan vere eit godt utgangspunkt for ein samtale med borna. Om kjønnsroller. Og om vi alle MÅ innordne oss éitt av to kjønn. Mange, både kvinner og menn, slit på grunn av gammaldagse kjønnsnormer. Mange skeive lid under mytar om korleis eit parforhold må vere. Og mange trans lid, fordi samfunnet har fordommar, og tviheld på at ein må vere anten vere mann eller kvinne.

Dette er veldig skadeleg. Det er forskning som viser at det faktisk er direkte helsefarleg! Utagering og eventuell seksualisering under Pride, er eg ikkje så redd for.

Om ikkje anna, så vil dette utfordre normene og tankegangen vår. Slik at vi ikkje utan vidare godtek den stadige, dårlege seksualiseringa og dei tronge kjønnsrollene vi blir forsøkt skvisa inn i. For dét er usunt, det!

For min del kunne det vore Pride heile året!

Har du noko på hjarta? Skriv til oss på framtida @ tips.no!

Les også meiningsinnlegget: Eg legg til dagleg merke til at det er minimalt med opne homofile på min alder på bygda

Thanushan Thaya
er leiar i Skeiv Ungdom Sogn & Fjordane. Foto: Privat.
Oppdatert: sundag 30. juni 2019 17.44

LES OGSÅ

Kommentarar

ANNONSE