Forskarar vil utnytta plasten som forureinar havet
Plastforsøpling av havområda er rekna som eitt av dei største miljøproblema globalt. No vil forskarar frå Sintef utnytta moglegheitene som avfallet gir.
Denne artikkelen er eldre enn 1 år gamal. Det betyr at noko av informasjonen kan vere utdatert.
– Den beste strategien er å prøva å forhindra at plast og avfall kjem ut i havet i første omgang, seier sjefforskar Kåre Helge Karstensen i Sintef.
Dei største bidraga til forsøplinga kjem av avrenning frå industriområde og avfallsfyllingar til dei store elvene, særleg i Asia. Viss avfallsbehandlinga i desse områda blir betre, spesielt i låginntektsland og veksande økonomiar, kan framtidig tilsig reduserast betydeleg, meiner forskarane.
Her finn du svar på nesten alle spørsmål du har om plast.
Vinn-vinn
Prosjektet «Ocean Plastic Turned into an Opportunity in Circular Economy» blir leia av Sintef og er finansiert av det norske bistandsprogrammet mot marin forsøpling.
– Prosjektet har som mål å demonstrera nye vinn-vinn-løysingar for avfallshandtering, der ikkje-gjenvinnbart plastavfall blir nytta som energi i lokal, energiintensiv industri. Dette er mest energieffektivt, og i tråd med sirkulær økonomisk tenking, seier Karstensen i ei pressemelding.
Det vil redusera behovet for deponering og brenning og redusera bruken av ikkje-fornybare energikjelder og råmateriale i energiintensive industriar, og dermed også redusera utsleppet av klimagassar.
Les også om korleis nokre av dei største selskapa i verda vil hindre at plastemballasjen deira endar opp i havet: Frå plastversting til resirkuleringsgigant
