Fiskefolkefest i nord
Årets verdsmeisterskap i skreifiske går av stabelen 16. og 17. mars i Svolvær i Lofoten. Det er venta deltakarar frå mange nasjonar, både amatørar og profesjonelle.
Denne artikkelen er eldre enn 1 år gamal. Det betyr at noko av informasjonen kan vere utdatert.
Den første konkurransedagen er det Lofotcup, medan sjølve VM skjer på dag to.
VM i skreifiske er sagt å vere det største arrangementet i Nord-Norge på vinteren. Det byrja for første gong i 1991 og sidan har konkurransen vore årviss i mars og går over to dagar. Det er Vågan båt- og sjøfiskeforening som står bak den etter kvart så tradisjonsrike tevlinga.
Det første året var det 220 påmelde til konkurransen, men sidan har deltakartalet vore oppe i 660 på det meste. No har arrangøren vedteke å avgrense talet på deltakarar til maks 600 personar på grunn av manglande båtplassar og overnattingskapasitet.
- Les også: Det herre her kallast fiskelykke!
Amatør og proff i ulike klassar
Båtforeininga leiger inn om lag 80 båtar frå Brønnøysund i sør til Tromsø i nord til arrangementet. Desse skal frakte deltakarane ut på fiskefeltet eit stykke ut frå hamna i Svolvær.
VM i skreifiske er for både amatørar og profesjonelle havfiskarar. Dei fleste deltakarane er hobbyfiskarar og turistfiskarar frå heile verda. I tillegg deltar det om lag 50–60 profesjonelle havfiskarar. Av alle deltakarane brukar det å vere med om lag 30 prosent damer og 70 prosent herrar, opplyser arrangøren på nettsidene sine.
- Les også: Andrea Maud skal jakta på Lofottorsken
Cup og VM
Den første dagen er det Lofotcup. Då vert det konkurrert i størst totalfangst (uansett fiskeslag) for medlemmer av havfiskeklubb, størst totalfangst (uansett fiskeslag) for deltakarar av turistklasse og største fisk (uansett art).
Den andre konkurransedagen er det duka for sjølvaste verdsmeisterskapen i skreifiske. Då skal det kårast vinnar av største totalfangst for medlemmer av havfiskeklubb, størst totalfangst for deltakarar av turistklasse og kven som får den største skrei-ruggen.
Det er også ein premie til den båten som har størst gjennomsnittleg fangst per person under VM på laurdagen.
Folkeliv i hamna
Men det er ikkje berre på fiskefeltet det er stor aktivitet denne marshelga. I kjølvatnet av tevlinga er det folksamt i lofotbyen og mykje sosialt samvær både på pubar, kafear og restaurantar. Berekningar anslår at mellom 5- og 6.000 personar kjem til Svolvær dei to dagane arrangementet går føre seg.
