Éin av fem vel borgarleg konfirmasjon
I alt 11.288 fjortenåringar har meldt seg på til humanistisk konfirmasjon i 2018 før fristen gjekk ut 1. oktober. Det er nesten ein femdel av årskullet og rekord, fortel Human-Etisk Forbund.
Denne artikkelen er eldre enn 1 år gamal. Det betyr at noko av informasjonen kan vere utdatert.
I år har 10.509 ungdommar vald å konfirmere seg borgarleg, noko som er om lag 17,4 prosent av årskullet.
Neste år har 18,2 av årskullet meld seg på til humanistisk konfirmasjon, skriv Fritanke.no.
- LES OGSÅ: Konfirmasjon – ein beinhard konkurranse
På grunn av den nye folkeregisterlova kunne Human-Etisk Forbund (HEF) og andre livssynssamfunn i år ikkje hente ut adressene til fjortenåringane frå folkeregisteret og sende ut brev, slik dei har gjort før. Det har organisasjonen vore spent på om kom til å ha nokon effekt.
Organisasjonen har prøvd å kompensere gjennom andre typar kampanjar, fortel seremonirådgivar i HEF Siri Sandberg.
– Vi har satsa på å vere synlege i sosiale medium. Vi har hatt film, bilete og artiklar som vi har delt i sosiale medium, og som har vore retta mot målgruppa og foreldra deira. Kommunikasjonsavdelinga har òg laga annonsar og plakatar som lokallaga har kunna bruke, seier Sandberg til Fritanke.no.
- FÅ OGSÅ MED DEG DENNE SAKA FRÅ 2012: Nikolai er den einaste i venegjengen som ikkje skal konfirmere seg i kyrkja
