Oljenedtur pregar kommune-NM

NHO: Her er dei beste kommunane

Mange oljekommunar fell på resultatlista i kommune-NM, men Sola tronar framleis øvst, og Stavanger held seg på femteplass.

NHO og Vista Analyse står bak den årlege kåringa av Noregs mest attraktive og berekraftige kommunar, og nedturen i oljesektoren pregar mange kommunar der denne sektoren er viktig, skriv Dagens Næringsliv.

– Resultata av kommune-NM i år teiknar eit tydeleg bilete av ei oljenæring i krise. Men vi ser også at omstillinga har komme godt i gang og at nedturen i oljenæringa til ein viss grad blir utlikna av ei positiv utvikling i meir tradisjonell industri, seier Ingebjørg Harto, som er direktør for næringspolitikk i arbeidsgjevarorganisasjonen NHO. Og botnen kan vere nådd, trur Harto.

– Vi meiner at det er mange indikasjonar på at 2016 vil vere botnåret for oljenæringa, og at aktiviteten vil ta seg opp igjen i 2017.

Trass oljenedturen er det endå ein gong Sola som vinn kåringa, følgt av Bærum og Oslo på dei neste pallplassane. Deretter følgjer Asker, mens oljehovudstaden Stavanger hamnar på femteplass. Også Sandnes er inne på topp ti. Men i det store biletet er det oljekommunane i sør og vest som er taparane. 73 prosent av kommunane i Rogaland fell på rangeringa.

Kristiansund er den store kommunen som fell mest – 20 plassar til nummer 163. (©NPK)

Sjå heile lista her: