Høgskulen på Vestlandet får 11 millionar til samanslåing
– 11 millionar er greitt, men vi hadde kanskje forventa eit litt høgare nivå, seier rektor ved HiB.
![](https://framtida.no/wp-content/uploads/2023/09/Framtida-logo-160x160.png)
![info](https://framtida.no/wp-content/themes/framtida/images/info.png)
Denne artikkelen er eldre enn 1 år gamal. Det betyr at noko av informasjonen kan vere utdatert.
Fredag avgjorde Kongen i statsråd at høgskulane i Bergen, Sogn og Fjordane og Stord/Haugesund vert Høgskulen på Vestlandet frå 1. januar 2017. Vedtaket var venta etter at alle dei tre høgskulane førre veke gjorde positive vedtak i fusjonssaka, skriv På Høyden, nettavisa til Universitetet i Bergen.
Rektor ved Høgskulen i Bergen Ole-Gunnar Søgnen er fornøgd med tildelinga frå Kunnskapsdepartementet, men meiner at behovet eigentleg er mykje større.
– 11 millionar er greitt, men vi hadde kanskje forventa eit litt høgare nivå. Men det er på linje med det dei som fusjonerte i fjor fekk, seier Søgnen til nettavisa.
Glad for nynorskprofil
Sjølv om høgskulane no blir slått saman, skal det framleis vere fem studiestader, Haugesund, Stord, Bergen, Sogndal og Førde.
– Høgskulen på Vestlandet vil ha eit klart mål om å bli universitet med ein profesjons- og arbeidslivsretta profil. Eg støttar dette målet. Eg er også glad for at Høgskulen på Vestlandet frå starten viser eigenart ved å ha nynorsk som primærarbeidsspråk, seier kunnskapsminister Torbjørn Røe Isaksen i ei pressemelding om løyvinga.
Han peikar samtidig på ar han har høge forventningar til at samanslåinga gjer Høgskulen på Vestlandet godt rusta til å møte utfordringar og moglegheiter i åra som kjem. (©NPK)
Les meir:
Vegen mot fusjonen har vore lang. Men det er no det startar.
Studentane på Høgskulen i Sogn og Fjordane var lenge motstandarar av fusjonen. No må dei snu.