Kan ha funne den niande planeten
Astronomen som sørgde for å degradere Pluto til dvergplanet, er no på sporet av det som kan vere den niande planeten i solsystemet.
Denne artikkelen er eldre enn 1 år gamal. Det betyr at noko av informasjonen kan vere utdatert.
Kan ha funne den niande planeten
Ideen om ein diger islagt planet langt, langt der ute ein stad, stammar frå observasjonar av avvikande banar hos ein del objekt i Kuiperbeltet, asteroidebeltet utanfor Neptun-banen.
No meiner den kjende romforskaren Mike Brown ved California institute of technology (Caltech) å ha funne bevis for at teorien stemmer, skriv nettavisa Tech Times.
Brown og kollegaene hans har nyleg observert ein asteroide i Kuiperbeltet som meir tydeleg enn andre verkar å bli tvinga inn i ein rar bane, noko dei meiner må komme av ei sterk gravitasjonskraft i nærleiken. Den krafta kan vanskeleg vere noko anna enn ein stor planet, meiner dei.
LES OGSÅ: Dette bildet av ei eksploderande stjerne er historisk
Den niande planeten skal ha ti gonger så mykje masse som jorda og vandrar rundt sola i ein utstrekt elliptisk bane som tar 10.000– 20.000 år å fullføre, trur forskarane. Til samanlikning bruker Pluto 248 år på ein tur rundt sola, mens den næraste naboen vår i solsystemet, Mars, joggar rundt sola på litt under 2 år.
Den amerikanske romfartsorganisasjonen Nasa slo så seint som i februar fast at planet nummer ni framleis berre er teori, men dette kan altså endre seg når Brown og co. får foredla dei førebelse resultata sine i ein forskingsrapport. (©NPK)
QUIZ: Kva veit du om verdsrommet?
Hey Planet Nine fans, a new eccentric KBO was discovered. And it is exactly where Planet Nine says it should be. pic.twitter.com/oZn0RDq8JF
— Mike Brown (@plutokiller) 24. mars 2016
LES OGSÅ: – Kjempestruktar rundt stjerne kan vera laga av romvesen
