Batteriferjer knuser dieselferjer

Av dei totalt 180 ferjene som kryssar norske fjordar, vil det løna seg å skifta ut 84 av ferjene til batteridrift og 43 ferjer til hybrid drift. Det tilsvarer over 70 prosent av den norske ferjeflåten. Det er konklusjonen i ei fersk  undersøking som Siemens har laga i samarbeid med Bellona.

Studien tek utgangspunkt i erfaringane frå batteriferja «Ampere», som har brukt dei elektriske løysingane frå Siemens.

Tidlegare i år la Energi Norge og DNV GL fram ein rapport som viste at batteriferjer ville vera lønsamt på 20 ferjesamband av 52 med overfartstid på mindre enn 30 minuttar.

LES SAKA: El-ferjer meir lønsamt på 20 ferjesamband

Krev at batteri blir standarden
Batteriferja «Ampere» blei sett i drift i vinter, men så langt har ingen andre ferjestrekningar fått elektrisk drift. No krev Bellona at batteri- og hybridferjer blir standarden når staten og fylka kunngjer nye ferjeanbod.

– Omstillinga må starta no. Dei næraste åra skal ti nye ferjestrekningar med totalt 22 ferjer ut på anbod. 20 av dei eignar seg for batteridrift. Teknologien finst og det er økonomisk lønsamt. Det er ikkje lenger noko alternativ å halda fram med miljøfiendtlege dieselferjer, seier Frederic Hauge, fagleg leiar i Bellona i ei pressemelding.

LES OGSÅ: Vil starte miljøløft i Hordaland

– Teknologien er moden
Han krev at samferdselsminister Ketil Solvik-Olsen følgjer opp Sundvolden-erklæringa, der det står at regjeringa vil «Utarbeida krav om at alle nye offentlege køyretøy, og alle nye drosjer, ferjer, rutebåtar og dieseltog, nyttar låg- eller nullutsleppsteknologi når teknologien tilseier dette.»

Både Bellona og Siemens har set seg lei på at regjeringa og Solvik-Olsen gøymer seg bak at teknologien ikkje er moden.

– «Ampere» har tilbakelagt ei strekning tilsvarande ein halv gong rundt jordkloden. Teknologien fungerer, det er berre å ta henne i bruk, seier Odd Moen, leiar i marinedivisjonen i Siemens i pressemeldinga.

LES OGSÅ: Elbilar er pengesluk for ferjeselskapa