Ladar opp til valkamp
Gjennom tre dagar har Arbeiderpartiet sin andrekandidat til stortingsvalet i Møre og Romsdal, Fredric Holen Bjørdal (22), vore på kandidatskolering.
Denne artikkelen er eldre enn 1 år gamal. Det betyr at noko av informasjonen kan vere utdatert.
På LO sitt konferansesenter i Sørmarka og på Stortinget har mange av kandidatane til Arbeiderpartiet dei siste dagane vore gjennom kandidatskolering.
– Eg har vore på møte med Statsministeren og Arbeiderpartiet for å sparke i gang valkampen. Her skal vi finslipe retorikken, velje ut våre hovudsaker og skolere oss på dei. Så vi har jobba knallhardt i tre dagar for å vere så godt rusta til valkampen som vi kan verte. Vi skal vinne valet og vi skal ha fire nye år. Difor må vi sjølvsagt byrje no, seier Bjørdal.
– Oppteken av kunnskap og utdanning
Fleire ifrå toppleiinga i partiet, i tillegg til statsminister Jens Stoltenberg, har tatt del i kandidatskoleringa. Stoltenberg har også fleire lovord å kome med om Bjørdal.
– Fredric Holen Bjørdal er spesielt oppteken av kunnskap og utdanning. Vi treng folk som han på stortinget. Og så er han god til å plukke jordbær, det har vi nemleg gjort saman på Norddal, seier statsministeren.
– Treff Stoltenberg i beskrivinga han gjev av deg?
– Det er rett det han seier om det eg er oppteken, og så er det litt artig at han sett pris på jordbærplukkinga i Valldalen, seier Bjørdal.
– Skal ha inn tre representantar
Den unge politikaren har god tru på at Arbeiderpartiet skal gjere ein godt val i Møre og Romsdal, og han trur at sjansane er gode for at han vert å finne på Stortinget etter valet.
– Alt ser ut til at det skal verte slik. Sjølvsagt er vi avhengig av å gjere ein god valkamp for vi skal ha inn tre og ikkje berre to på Stortinget frå Møre og Romsdal. Det må jobbe knallhardt for å få til. For er det veldig spennande å vere nominert, og eg er ein av dei yngste som er nominert. Kanskje vert eg den yngste på Stortinget etter valet. Så det er ekstra spennande for meg, seier Bjørdal.
LES OGSÅ: Lekser og sidemål på landsmøte
– Er ikkje bekymra
– Korleis ser på du sjansane til Arbeiderpartiet for å gjere eit godt val i Møre og Romsdal?
– Slik eg ser det så har vi alle føresetnader for å gjere eit knakande godt val. Meiningsmålingane i fylket er bra, vi har mange gode saker og vi har fått veldig mykje bra som vi også skal få fram i valkampen. Eg er ikkje bekymra for Arbeiderpartiet i Møre og Romsdal, og eg sikker på at vi vil gjere eit veldig godt val.
