3 av 10 gulrøter er for stygge

Kvart år blir det produsert rundt 2000 tonn gulrøter i Noreg, men av desse går berre 1200 tonn ut til forbrukarane. Det kjem fram gjennom Østlandsforskning sitt forskingsprosjekt om svinn i jordbruks- og matproduksjon.

– Gulrøtene blir hovudsakleg tekne ut på grunn av utsjånad, men det er også snakk om ein del andre skavankar, fortel dagleg leiar ved Solør Grønt, Kjell Rønning til NRK.

– Vi har og ein billig variant i butikken, han er forholdsvis populær. Det er jo den same smaken, dei ser berre litt annleis ut, seier gulrotbonden. Gulrøtene som ikkje er bra nok til å bli menneskemat blir ikkje kasta, men blir heller brukt som dyrefôr.