Ørjan Johannessen (26) frå Austevoll vann Bocuse d´Or Europe.

mm

Kokken på Bekkjarvik Gjestgiveri i Austevoll sør for Bergen vann i dag det som kan samanliknast med europameisterskapen for kokkar.

Nordmannen konkurrerte mot 20 nasjonar, der dei 12 beste går vidare til den prestisjetunge kokkekonkurransen Bocuse d'Or Lyon, som blir sett på som verdsmeisterskapen for kokkar, i januar neste år.

Kokkane skulle presentere eit fiskefat og eit kjøtfat der hovudråvarane var sjøtunge, reker og kylling.

I juryen sat fleire leiande europeiske kjøkkensjefar, blant andre den ikkje heilt ukjende kokken Eyvind Hellstrøm, som sjølv kom på 5. plass i Bocuse d´Or i 1989.

Ministeren gratulerte
Landbruks- og matminister Lars Peder Brekk gratulerer Ørjan Johannessen med gullet.

– Her har det vore ein knalltøff konkurranse og difor er dette eit veldig bra resultat. Nok ein gang har Noreg kome øvst på pallen i ein krevjande internasjonal kokkekamp. Dette er også gull til norsk matkultur. Gratulerer så mykje med seieren Ørjan, seier Brekk som også gratulerer assistenten hans, Julie Ekse Jenssen (20) med innsatsen.

Noreg på kokketoppen
Ørjan Johannessen blei Årets Kokk 2011 her heime, og har godt norsk selskap blant tidlegare Bocuse d´Or-deltakarar.

Det er tredje gongen Bocuse d'Or Europe er blitt arrangert, og Noreg har gjort det skarpt også tidlegare. Geir Skeie tok gull i 2008, medan Gunnar Hvarnes fekk med seg ei sølvplassering i 2010.

Norske deltakarar og plasseringar i Bocuse d’Or Lyon:

1987: Arne Brimi, Semifinalist
1989: Eyvind Hellstrøm, 5. plass
1991: Lars Erik Undertun, Sølv
1993: Bent Stiansen, Gull
1997: Odd Ivar Solvold, Bronse
1999: Terje Ness, Gull
2003: Charles Tjessem, Gull
2005: Tom-Victor Gausdal, Sølv
2007: Sven Erik Renaa, Beste fisk
2009: Geir Skeie, Gull
2011: Gunnar Hvarnes, Bronse 

Sjå biletserie frå Flickr her:

Oppdatert: onsdag 24. mai 2017 15.35
ANNONSE