Vann pris for avisa si
Denne artikkelen er eldre enn 1 år gamal. Det betyr at noko av informasjonen kan vere utdatert.
Gol ungdomsskule er ein FN-skule og har ofte utmerkt seg med sitt engasjement for FN og saker som organisasjonen jobbar med. Når 8b denne våren også skulle ha Avis i skulen, så gjorde dei begge ting samstundes – dei laga FN-avis.
– Me har drive med prosjektet Avis i skulen i meir enn 30 år, og det var naturleg å kombinere det med vår status som FN-skule, fortel rektor Hallgeir Haugen. Han legg til at det er ekstra motiverande å jobbe med noko når ein kan vere med i ei tevling, og når ein på toppen av det vinn. Ja, då kan det ikkje bli betre.
Kongo-nytt
Dei tre elevane Kim Daniel Viko, Vilde Fossum Walaker og Liv Malin Jørmeland Evenstad står bak nettavisa Kongo nytt. Avisa tek for seg situasjonen til born i Kongo, og dei unge journalistspirene har mellom anna skrive om FNs tusenårsmål, problematikken med malaria, HIV og AIDS og korleis barn har det i Kongo.
– Eg har lært utruleg mykje, fortel Vilde. Noko også dei to andre kan seie seg einige i. – Det hadde vore spennande å kunne besøke Kongo, men etter alt eg har lært om landet veit eg ikkje om eg hadde turt, seier Liv Malin.
Pokal
Avisa vart sent inn etter ei intern tevling i klassen. Dei var dei einaste i sin klasse. Arbeidet med alt frå artiklar, lesarinnlegg, biletinnsamling og 5 på gata overbeviste FN-sambandet som poengterer at det absolutt var ein velfortent siger.
Klassen ventar på pokalen som er på veg, og dei tre forfattarane får også ein minnepinne kvar frå FN.
