Aldri har utsleppa vore så store
Internasjonale tal skremmer. Blir vanskeleg å unngå auke av temperaturen på meir enn to grader.
Denne artikkelen er eldre enn 1 år gamal. Det betyr at noko av informasjonen kan vere utdatert.
Ifølgje Det internasjonale energibyrået (IEA) sine utrekningar, førde ny økonomisk vekst med seg ein auke i CO2-utsleppa på 1,6 gigatonn. Det er den høgaste utsleppsauken på eitt år til no, ifølgje den britiske avisa The Guardian.
– Dette er så dårlege nyhende om utslepp som ein kunne få, seier IEAs sjeføkonom Faith Birol til avisa.
– Det kjem til å bli ekstremt krevjande å halde den globale temperaturauken under 2 grader. Utsiktene blir dårlegare, seier han vidare.
Togradersmålet
Dei fleste forskarane meiner ein temperaturauke på over to grader i forhold til førindustriell tid inneber farlege klimaendringar og meir ekstremvêr.
KOMMENTAR: Klimavalg 2011?
IEA meiner dei årlege energirelaterte utsleppa ikkje bør overstige 32 gigatonn i 2020. I fjor var utsleppa på 30,6 gigatonn, og rundt tre firedeler av auken var i veksande økonomiar. Noreg er mellom dei få i-landa som har ein stor auke, og hadde i fjor dei høgaste CO2-utsleppa nokonsinne.
Åtvarar
Nicholas Stern ved London School of Economics, som har skrive ein viktig rapport om økonomien i samband med klimaendringar, spår alvorlege konsekvensar om ikkje utsleppa blir bremsa.
– Desse tala viser at me er tilbake til «business as usual». Ifølgje utrekningar inneber dette at sjansen for ein temperaturauke på 4 grader innan 2100 er 50 prosent, seier han.
QUIZ: Prøv den store klimaquizen vår!
Ein så sterk auke vil føra til store forstyrringar i liva til hundrevis av millionar av menneske over heile kloden, til store folkeforflytningar og til konflikt, understrekar han.
Kva meiner du må gjerast for å få ned klimautsleppa?
