Inn i framtida med Robyn

Det store tenåringsgjennombrotet
Den 12. juni 1979 vart jenta som seinare skulle kalle seg Robyn, fødd. Ho heiter eigentleg Robin Miriam Carlsson og voks opp i Stockholm i Sverige. Begge foreldra hennar jobba med teater, og då ho var unge, var Robyn med i teaterstykke og film. Som 12-åring opptredde ho på tv-programmet Söndagöppet, og song inn tittelmelodien til sportsprogrammet Lilla sportspegeln.

Men det var den svenske popstjerna Meja som «oppdaga» Robyn – det vil seie ho sette henne i kontakt med sitt eige management. Då Robyn var 15, skreiv ho kontrakt med plateselskapet RCA Records. Året etter kom singelen «You've Got That Something» (1995) – og oppfølgjaren «Do you really want me (Show respect)», som vart ein kjempehit i både Sverige og Noreg. Albumet «Robyn Is Here» kom året etter.

Om Robyn var ein 16-åring med svært stor suksess i 1996, var det ingenting samanlikna med det ho opplevde året etter. Debutalbumet vart lansert i USA, og to av tre singlar som vart sleppte, fekk topp 10-plasseringar. Dei tre singlane selde til saman 1,5 millionar eksemplar berre i USA. Same år skreiv Robyn ein song til svensk Grand Prix som heitte «Du gör mig hel igen».
    
Skandinavisk suksess
Robyn sitt andre album, «My Truth» (1999), var sterkt kritikarrost – og blir omtala som det mest sjølvbiografiske albumet. Men tekstene til Robyn er jamt over fritalande og ærlege; ho har sunge om tema som einsemd og sjølvstende i heile karrieren. Singelen «Electric» vart populær over store delar av Europa, men trass i dette ville ikkje plateselskapet lansere albumet i USA fordi dei meinte det mangla hits.

Etter utgjevinga av «My Truth» jobba Robyn mindre med musikk ei stund; ho var blant anna UNICEF-ambassadør. Ho fekk Karamelodiktstipendiet i 2000. To år etter bytte ho plateselskap til Jive Records og gav ut albumet «Don't Stop The Music». Også dette hadde populære singlar og selde godt i Europa, men fekk ikkje lansering i USA. Sommaren 2003 la Robyn ut på ein turné som fekk svært positiv omtale.

Robyn blir elektropopdronning
Etter at plateselskapet nekta å lansere dei to siste albuma til Robyn i USA, tapte ho eit stort publikum, og i 2004 bestemte ho seg for å seie opp kontrakten. I staden starta ho sitt eige selskap, Konichiwa Records. I mars 2005 var Robyn sin første singel «Be Mine!» klar. Denne gongen var lydbildet eit ganske anna; Robyn laga framleis popmusikk, men med tydeleg smak av elektro. Albumet, som ganske enkelt heitte «Robyn», kom månaden etter og selde svært godt. Før utgjeving i Storbritannia gav Robyn ut smaksprøve-ep-en «Rakamonie EP» (2006). I tillegg til førstesingelen var også «Handle Me» og «With Every Heartbeat» store hits og nådde toppen av hitlister i fleire land. Ho fekk tre svenske Grammy-prisar for albumet i 2006.

I 2008 var Robyn oppvarming for Madonna på konsertane hennar i Europa. Året etter song ho på Röyksopp-hiten «The Girl And The Robot», og vann Grammy for beste live-opptreden. Men Robyn fekk sitt verkeleg store oppsving i 2010. Det nye albumet «Body Talk» vart spelt inn og gjeve ut i tre delar – i april, september, og no i november. Dei to første utgjevingane fekk mykje omtale og ros; Robyn var blant dei heitaste namna festivalsommaren 2010, både i Europa og USA. Dette kom til ei viss grad av førstesingelen «Dancing On My Own», som vart ein kjempehit. Både del 1 og 2 av albumet er fullstappa med vemodig, dansbar musikk – det er berre å gle seg til del 3.

Robyn 'Dancing On My Own' (Official Video) from Robyn on Vimeo.