Låge drapstal i Noreg
Så langt i år har det vore 29 drap i Noreg. Det er lågare enn på mange år. Forskarane meiner det gode livet i Noreg er årsaka.
Denne artikkelen er eldre enn 1 år gamal. Det betyr at noko av informasjonen kan vere utdatert.
– Difor er det så få drap i år
Talet på drap i Noreg har dei siste åra lege stabilt i overkant av 30. Ser ein bort frå terroraksjonane 22. juli i fjor, var det 34 drap i fjor, 31 drap i 2010 og 30 drap i 2009, skriv Dagbladet.
Fleire forskarar meiner det er det gode livet i Noreg som gjer oss mindre valdelege og fører til så få drap i eit land med fem millionar innbyggjarar.
– Vi veit at når det er store skilnader i samfunnet på til dømes fattig og rik, likestilling og legitimitet i folket, er det meir vald. I Noreg er desse risikofaktorane for utøving av vald nærmast heilt fjerna, seier valdsforskar Ragnhild Bjørnebekk ved Politihøgskolen.
Kriminolog og drapsforskar Vibeke Ottesen ved Universitetet i Oslo meiner samfunnsstrukturen og det at forholda i psykiatrien er så stabile i Noreg, også er med på å halde drapsfrekvensen nede. (©NPK)
