Lærte foreldra sine om nettvett

På eit foreldremøte denne veka har dei vaksne fått læra om haldningar på nett, med sine eigne born som lærarar.

– Det er alltid vi som skal lære nye ting, og no får vi endeleg lov til å lære bort noko, seier Synne i klasse 7c til reddbarna.no. Saman med klassekameratane har ho laga og øva på skodespel om nettvettreglene og laga plakatar.

Nettvettreglane blir skodespel
Jan Magne og May Liss ynskjer dei vel 20 frammøtte velkommen, og fortel at sjølv om det føregår ein del baksnakking og ”ditching” på mobil og Internett, er begge deler først og fremst positivt.

På rekkje og rad gjennomfører klassa eit lite skodespel for kvar av Redd Barna sine sju nettvettreglar.

LES OGSÅ: Fryktar at 21.000 kjem i bursdag

I det mest alvorlege skodespelet viser dei korleis Tore 13 år på nett i røyndomen er Per 56 år.

Gjeld vaksne òg
– Nettvettreglane gjeld òg dei vaksne, seier fleire av elevane.

– Dei må òg vere forsiktige og tenkja over kva for ein informasjon dei deler om seg sjølv, og ikkje dra å møte nokre dei har vorte kjent med på nett åleine, og tenkja over kva slags bilete dei legg ut på Facebook av seg sjølv og andre, forklarar Maria.

Foreldra Linda Dale, Christel og Odd-Petter Woll er samde om at dette var eit veldig interessant foreldremøte.

– Det er bra at dei får fram det positive med bruk av mobil og Internett og viser at det er gode verktøy når dei brukast med fornuft, seier Odd-Petter.