Meir kartongkritikk til Tine
I desember hausta Tine mykje kritikk for å ha ein ulv avbilda på mjølkekartongen. No er dei i hardt vêr igjen. Denne gongen er det knytt til avbilding av og informasjon om kornsirklar på skulemjølkkartongar.
Denne artikkelen er eldre enn 1 år gamal. Det betyr at noko av informasjonen kan vere utdatert.
Det var Norsk landbruk som først omtalte saka.
«Kornsirkler er et fenomen som kan oppstå i åkeren. Kornsirkler dannes når felt av kornet på uforklarleg vis legger seg ned slik at det dannes geometriske mønstre.» Står det på dei nye skulemjølkkartongane til Tine.
– Dette er like alvorleg som at det står feil i skulebøker. Når Tine som kommersiell aktør får innpass i klasserommet og i tillegg då vel å sette informasjon på mjølkekartongen, så bør dei vere strengare på kva informasjon dei kjem med. Dei har eit samfunnsansvar i at den informasjonen er korrekt, seier ein av skeptikarane Christoffer Lorang Dahl, som la ut eit kritisk innlegg på Facebook-sidene til Tine, til NRK.
Kornsirklar er namnet på det fenomenet at planter eller korn i ein åker ligg nede, som oftast i geometrisk formasjon. I vitskapelege kretsar er det brei semje om at dei er menneskeskapte.
