Ho var først på alle norske 2000-meter
Som 17-åring gjekk Berit åleine i fjellheimen i tre veker, utan mobil, GPS eller radio.
Denne artikkelen er eldre enn 1 år gamal. Det betyr at noko av informasjonen kan vere utdatert.
Denne saka var først publisert i Porten.no.
Då ho var 17 år gjekk Berit Vetti i Jotunheimen åleine i tre veker. Utan mobil, GPS, radio eller nokon anna form for kommunikasjon med omverda.
– Eg budde stort sett på fjellet i studietida, fortel Vetti (71) då Porten møter ho heime i Utladalen.
Sjølv var ho ikkje til stade då Knut Tønsberg drog ho fram som ein av pionerane i det norske fjellmiljøet under føredraget på onsdag.
LES OGSÅ: «Eg slår eit slag for keisamheita»
Likte seg best ute
I si tid klatra Vetti dei 20 brattaste armane på Jostedalsbreen og var den første som klatra alle 2000-meterstoppane i Norge.
– Eg likte meg best ute. I feriane som me hadde i studietida brukte me på å bestige alle 2000-meterstoppane og guida folk til fjells, fortel Vetti.
Ho fortel at dei gjekk etter den gamle lista over 2000-meterstoppar i Noreg og at denne har blitt forandra i ettertid.
– Me tok ein steil frå alle vardane som me besøkte. Men me passa på å leggja ein stein tilbake slik at me ikkje robba varden, seier ho medan ho treg på smilebandet.
LES OGSÅ: «Eg gjorde ingenting i eitt halvår»
"Fjellets mester"
Storsmeden i Rondane var den siste toppturen Vetti klatra i år 1975. Før det hadde ho klatra det meste som fanst. Alt frå Galdhøpiggen til Glittertinden.
– Familien min kjem frå Blåbæråsen i Moss. Kvar påskeferie frå eg var sju til 14 år drog me til Blåfjell i Hallingdalsfjella. Der var det åsar og fjell. Det var nok det som gjorde at eg fekk sansen for naturen, fortel ho.
I 2012 fekk Vetti prisen "Fjellets mester" av turiststasjonen på Krossbu. Mykje av grunnlaget for prisen la ho då ho var breinstruktør nettopp på Krossbu på 60-talet.
Etter å ha undervist som lærar i Karasjok, Oslo og Trønderlag, flytta Vetti til Årdal for å jobbe som lektor på Årdal vidaregåande.
Toppturar i vinden
Ho er den første personen som har gått alle dei 269 2000-metersturane i Noreg, etter Burchardts klassiske liste.
– Det verkar som om toppturar er svært i vinden for tida, seier ho.
Fjellklatringa la ho på hylla då ho gifta seg med Jørgen Vetti som dreiv Vetti gard tett inne ved Vettisfossen i 1977.
LES OGSÅ: SKAM: Dette kan vi lære av William
– Det har vore mykje klatring og tinderangling i laus og ledig form gjennom livet mitt, seier ho.
Ho har blant anna gått Briksdalsbreen, Jostedalsbreen, Kjenndalsbreen og Bergsettbreen.
– Eg har gått dei fleste brearmar i Noreg. Ein skal aldri stole på ein bre. Det kan vere sprekkar som oppstår uventa, rådar ho framtidige eventyrarar.
