Snart kan du kanskje droppe treninga for ei pille
Denne artikkelen er eldre enn 1 år gamal. Det betyr at noko av informasjonen kan vere utdatert.
Trenings-pilla er på veg
Kan ei pille gi same effekten som ein intensiv sykkeltur eller ei treningsøkt på treningsstudioet?
Forskarar ved University of Sydney trur dei kan vere på god veg til å lage eit slikt legemiddel.
Ei kartlegging som dei australske forskarane no har gjort, viser at det skjer over 1.000 molekylære forandringar i skjelettmusklane under trening. Berre ein mindre del av desse har vore kjende frå før.
– Forskarane har lenge hatt mistanke om at trening fører til ein komplisert serie av forandringar i musklane, men dette er første gongen vi har klart å kartleggje nøyaktig kva som skjer, seier ein av forskarane bak studien, Nolan Hoffman.
Interessert i kuriøs forsking? Desse forskarane synte at tillit får hjarta til å banke i takt.
Det byr på ein del utfordringar å lage ei pille som løyser ut alle desse signalforandringane i kroppen, men får dei det til, skal pilla kunne gi same effekten som trening.
Målet er likevel ikkje å skape ei framtid der folk skal kunne komme i toppform utan å anstrengje seg, men å hjelpe sjuke som av ulike grunnar ikkje kan trene, til dømes hjartesjuke og overvektige.
Den australske studien er publisert i det vitskaplege tidsskriftet Cell Metabolism.
