VM gjorde Haaland til eit globalt fenomen – fekk 30 millionar nye følgjarar
Erling Braut Haaland har fått rundt 30 millionar nye Instagram-følgjarar under fotball-VM. Tala tyder på at han for alvor har vorte eit globalt fenomen.
Det starta med skåringane. Så kom cowboyhatten i Texas, dei sjølvironiske innlegga i sosiale medium og den utstoppa vaskebjørnen.
Millionar av nye fotballfans oppdaga nordmannen under hans første verdsmeisterskap. No viser tala kor stor Haaland-effekten faktisk har vore.
Ifølgje nyheitsbyrået AP har den norske landslagsspissen fått rundt 30 millionar nye Instagram-følgjarar sidan verdsmeisterskapen starta. Han har vakse frå rundt 41 millionar til over 70 millionar følgjarar på ein månad. Det er meir enn nokon annan spelar under meisterskapen.
Den eksplosive veksten gjer at Haaland no har fleire følgjarar enn Manchester City og alle andre klubbar i Premier League.
Tok VM med storm
For fotballsupporterar har Haaland vore ei verdsstjerne i fleire år. Verdsmeisterskapen gjorde han til ein profil også langt utanfor fotballen.
På banen skåra Manchester City-spissen sju mål og leidde Noreg til ein historisk kvartfinale. Utanfor banen vart han ein av dei mest omtala profilane til meisterskapen.
Bileta av Haaland med cowboyhatt i Texas gjekk verda rundt. Like stor merksemd fekk bileta av heimkomsten til Noreg med ein utstoppa vaskebjørn. Samtidig fylte han sosiale medium med humoristiske videoar, spontane Snapchat-klipp og sjølvironiske innlegg som nådde eit langt breiare publikum enn den tradisjonelle fotballoffentlegheita.
AP peikar på den uformelle og personlege stilen i sosiale medium som ein del av forklaringa på kvifor Haaland har vorte ein av dei største profilane til meisterskapen.
● Les også: Haaland går viralt i Kina
Eit større publikum
Professor Lars Olsen ved Institutt for marknadsføring ved Høyskolen Kristiania har tidlegare sagt til Aftenposten at VM gir ei eksponering klubbfotball ikkje kan matcha. Verdsmeisterskapen blir følgd av milliardar av menneske verda over og når eit publikum som elles ikkje følgjer Manchester City eller Premier League.
Tala ser ut til å underbyggja det. Ingen av dei andre store stjernene har vore i nærleiken av den same veksten. Til samanlikning auka Cristiano Ronaldo med litt over ti millionar følgjarar, medan Lionel Messi og Neymar Jr. fekk rundt seks millionar kvar, ifølgje analyseselskapet SocialBlade.
VM-finalen sette punktum for turneringa søndag. Haaland reiste heim med sju mål og ein historisk norsk kvartfinale. Men for millionar av nye følgjarar handla VM også om cowboyhatten, vaskebjørnen og den sjølvironiske humoren.
